Erongo vra privaat sektor vir N$230 m. vir skole

Die Erongo-streekraad wil hê die privaat sektor moet help om skoolinfrastruktuur ter waarde van N$230 miljoen te finansier, nadat die streek geen ontwikkelingsbegroting vir nuwe skole of klaskamers vir die 2026-’27-boekjaar ontvang het nie.Die raad het sy lys van behoeftes verlede week tydens die eerste Erongo-konferensie oor die belegging in onderwysinfrastruktuur in Swakopmund aan maatskappye, staatsbeheerde ondernemings en plaaslike owerhede voorgelê.’n Sessie op die agenda om fondse vir die infrastruktuur toe te sê of te verbind (pledge), het nie plaasgevind nie en geen toeseggings is gemaak nie.Volgens statistiek het die streek 99 skole – 56 staats- en 43 privaat skole – met 60 988 leerlinge en 2 137 onderwysers. Die raad beraam 64 037 leerlinge in 2027 en 67 239 in 2028.Die waarnemende direkteur van onderwys in Erongo, Helena Asino, het gesê 684 graad 1-leerlinge in Swakopmund is nie geplaas nie en dat meer as 2 161 leerlinge op Walvisbaai skool in skofte – kragtens die sogenaamde pelotonstelsel – bywoon.Die hoofonderwysbeampte, Natalia Guriras, het die aantal leerlinge wat skool in skofte bywoon in die Swakopmund-, Walvisbaai- en Omaruru-kring op ongeveer 4 279 geraam.Met verwysing na die inskrywingstydperk in Augustus het Asino gesê: “Daar was pleidooie om plek. Daar was soveel ouers wat voor verskillende skole gekamp het.”GEEN BEGROTINGOm 3 049 bykomende leerlinge in 2027 en 3 202 in 2028 te akkommodeer, benodig die streek ongeveer vier nuwe skole per jaar, 87 klaskamers in 2027 en 91 in 2028, asook onderskeidelik 87 en 91 bykomende onderwysers, het die direktoraat gesê.Asino het gesê die streek het van 2022-’23 tot 2026’27 N$16,7 miljoen aan ontwikkelingsbefondsing vir onderwysinfrastruktuur ontvang. Toekennings het van N$893 000 in 2023-’24 tot N$10,8 miljoen in 2025-’26 gewissel.“Gedurende die 2026-’27-boekjaar het ons geen ontwikkelingsbegroting ontvang om nuwe skole of nuwe klaskamers te bou nie,” het sy gesê.Asino het gesê die ministerie se hoofkantoor fokus op projekte wat reeds aan die gang is, insluitend ’n nuwe laerskool en ’n hoërskool by die informele nedersetting DRC in Swakopmund en ’n nuwe hoërskool op Hentiesbaai.Die ongeveer N$230 miljoen bestaan uit sowat N$123,6 miljoen vir kritieke projekte en sowat N$106,7 miljoen vir behoeftes wat deur die skoolhoofde van die 56 staatskole ingedien is. Die lys van kritieke projekte sluit nuwe hoërskole op Omaruru en in Swakopmund in, asook nuwe laerskole op Omaruru en Walvisbaai, met ’n gesamentlike waarde van N$107,6 miljoen. Die behoeftes van die Omaruru-kring maak die grootste deel uit van die versoeke wat deur skole ingedien is, met ’n totale waarde van N$64,2 miljoen.Guriras het gesê dié bedrae is ramings wat nog deur middel van tegniese assesserings en huidige markpryse bevestig moet word. Maatskappye kan ’n projek aanneem, saam met die regering en ontwikkelingsvennote belê, ’n fasiliteit toerus, ’n opknappingsprojek finansier of verskeie skole in een kring ondersteun.“Sommige behoeftes kan nie wag nie, geagte beleggers, geagte belanghebbendes. Ons moet nou optree,” het sy gesê.Die hoofstreekbeampte, Mupenzeni Ntelamo, het gesê bykomende klaskamers is geskik vir landelike skole soos Okongue, maar Swakopmund het nuwe skole nodig.“Dis nie weermagbasisse nie. Ja, dit is skole. ’n Skoolhoof kan nie 2 000 leerlinge bestuur nie. Dit is eenvoudig onprakties,” het hy gesê.GOEWERNEUR PLEIT OM HULPDie goewerneur van Erongo, Nathalia Goagoses, het gesê dat nie een van die vier handelsbanke die konferensie bygewoon het nie. Sy het gesê plaaslike owerhede hou geld ter waarde van “byna miljarde” in die banke.“En as hulle nie van Namibië af kom nie, is die werknemers wat vir hulle kom werk, ten minste Namibiërs. Hulle kinders is in hierdie skole,” het /Goagoses gesê.Sy het gesê sy sou na elke bank gaan om “verskoning te vra – dit was waarskynlik ’n laat kennisgewing – en elke bank te vra om fondse aan hierdie edel saak toe te sê of te verbind”.– adam@erongo.com.na

Erongo vra privaat sektor vir N$230 m. vir skole

Kommentaar

Republikein 2026-10-08

Meld asseblief aan om kommentaar te lewer

Erongo vra privaat sektor vir N$230 m. vir skole

Kommentaar

Republikein 2026-10-08

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.