Namcor: Lys van beskuldigdes groei

Die ma en tannie van die voortvlugtige Namcor-korrupsieverdagte, Victor Malima, is die jongste toevoegings tot die lys van beskuldigde persone in die Namcor–Enercon-bedrogsaak, nadat hulle gister in die Windhoek-landdroshof verskyn het ná hul arrestasie oor die naweek.

Martha Antindi (56), Malima se ma, en sy 33-jarige tannie en persoonlike sekretaresse Johanna Mundjego, het hul eerste verskyning voor landdros Olga Muharukua gemaak, waar hulle amptelik aangekla is van die hantering van opbrengste uit onwettige bedrywighede ingevolge die teenkorrupsiewet, geldwassery en diefstal.

Antindi verskyn as beskuldigde nommer 13 in die saak, terwyl Mundjego as beskuldigde nommer 14 gelys word.

Volgens die staat is geld wat uit Namcor Petroleum Trading and Distribution afkomstig is, aan Enercon Namibia betaal en later deur maatskappye wat aan Eco Trading en Eco Fuel Investment gekoppel is, na die twee beskuldigdes gekanaliseer.

Staatsaanklaers beweer Antindi het Eco Fuel Investment CC saam met haar seun besit, met ’n 50%-aandeel in die maatskappy en het ongeveer N$1,5 miljoen tussen Julie 2022 en November 2023 ontvang.

Mundjego word op soortgelyke wyse daarvan beskuldig dat sy oor dieselfde tydperk sowat N$1,5 miljoen ontvang het.

Die staat beweer die geld is van Enercon Namibia na Eco Trading se bankrekening oorgeplaas voordat dit aan haar uitbetaal is.

Antindi staar ook ’n bykomende diefstalklag in die gesig wat N$172 000 behels, wat staatsaanklaers beweer eweneens van Namcor-geld afkomstig is en deur Enercon Namibia en verwante maatskappye gegaan het.

Mundjego staar ’n afsonderlike diefstalklag in die gesig wat N$227 000 behels, wat die staat beweer ’n soortgelyke roete gevolg het.

Staatsaanklaer Menencia Hinda het borgtog teengestaan en aangevoer dat die aanklagte ernstig is en die beskuldigdes ’n vlugrisiko inhou.

Sy het verder benadruk dat die saak aansienlike bedrae openbare geld behels en dat die vrylating van die beskuldigdes nie in die belang van geregtigheid sou wees nie.

Die saak van nóg ’n beskuldigde en voormalige Bank Windhoek-werknemer, Heidi Boois, is op 30 Januarie tot 28 Februarie uitgestel om voorsiening te maak vir ’n amptelike borgtogaansoek en sodat haar prokureur, Kadhila Amoomo, ’n aansoek kan indien wat die geldigheid van die lasbrief vir inhegtenisname betwis. Hy het aangevoer dit was onvolledig.

– [email protected]