‘Hulle het oorlog teen ons gevoer’

Die aanklag van poging tot moord op die beheeraanklaer van Ondangwa, Justine Shiweda, is gister amptelik na klagte van moord en sameswering om moord te pleeg verander nadat sy Saterdag aan haar beserings beswyk het.  

Staatsaanklaer Yeukai Kangira het dit gister in die landdroshof op Grootfontein op rekord geplaas dat die aanklag na moord met 'n gemeenskaplike doel gewysig is, sowel as 'n tweede wysigingsaanklag van sameswering om moord te pleeg.

Dit was tydens die borgtogaansoek van die bekende mediese dokter van Ondangwa, Fillemon (Fly) Nakanduungile wat deur landdros Veruka Njembo tot 16 Februarie uitgestel is nadat die voorsittende landdros Mutwa Billy Lutaka nie beskikbaar was om die saak aan te hoor nie.

Shiweda is op 17 Oktober 2025 geskiet en met suur aangeval, na bewering nadat sy borgtog teengestaan het vir die vermeende reeksmisdadiger Abner Mateus wat in aanhouding was. Hy het glo vir haar ’n omkoopgeld van N$100 000 aangebied het in ruil daarvoor dat sy nie borgtog sou teenstaan nie.

Ses mans, onder wie Nakanduungile, is in hegtenis geneem en in verband met die voorval aangekla.

“Shiweda het haar lewe vir geregtigheid verruil en integriteit bo persoonlike veiligheid gekies,” het aanklaer-generaal Martha Imalwa Sondag gesê. 

“Shiweda is herhaaldelik gewaarsku dat haar lewe in gevaar is, tog het sy toegewyd gebly om geregtigheid te laat geskied.

“Hulle het oorlog teen ons gevoer. Haar dood sal nie tevergeefs wees nie. Ons sal nie oorgee nie en ons sal nog harder terugveg,” het Imalwa benadruk.

“Hulle het ’n onskuldige jong siel op die wreedste manier doodgemaak. ’n Hardwerkende lid van die regstelsel. Dít is die mense wat ons in vervolging wil hê.”

Imalwa het onthul dat Shiweda met drie koeëls in haar liggaam gesterf het, aangesien dokters net een kon verwyder.

Die goewerneur van Oshana, Hofni Iipinge, het bevestig dat president Netumbo Nandi-Ndaitwah Shiweda besoek het terwyl sy in die Lady Pohamba Private Hospitaal in Windhoek gehospitaliseer was. 

Shiweda het haar loopbaan stil, hardwerkend en doelgerig opgebou, verbind tot die oppergesag van die reg in ’n regstelsel wat dikwels veerkragtigheid sonder erkenning vereis. 

Sy het regte aan die Universiteit van Namibië (Unam) studeer en sewe jaar as aanklaer gewerk, met haar laaste plasing by die landdroshof in Ondangwa, waar sy vir haar ywer en harde werk erken is.

NASIONALE TRAGEDIE

“Daar is vir haar gesê haar lewe is in gevaar; sy moet net die geld vat. Sy het geweier, maar om iemand met suur op die afgryslikste manier te beseer, net omdat jy op borgtog wil uitkom vir misdade wat jy glo gepleeg het, dit is onaanvaarbaar,” het Imalwa benadruk.

Die gewelddadige aanval op Shiweda se lewe het die land geskok en die gevare uitgelig waarmee regsamptenare in die uitvoering van hul plig te kampe het.

Ná maande se mediese sorg het haar liggaam die maande lange stryd teen die grusame beserings verloor, wat ’n saak van poging tot moord in ’n nasionale tragedie verander het. Boodskappe van meegevoel het op sosiale media ingestroom, wat die diep impak van haar dood op kollegas, vriende en die breër gemeenskap weerspieël.

DIE VROU AGTER DIE BEROEP

Buite die hofsaal was Shiweda ’n toegewyde ma en dogter. Sy word oorleef deur haar ouers, Severus Shiweda Mushimba en Rosalia Kleopas-Mushimba, haar broers en susters, en twee kinders van nege en vyf jaar oud, wie se lewens onherroeplik deur haar dood verander is.

“Terwyl baie aandag steeds op die hofverrigtinge sal fokus wat uit haar aanval voortspruit, sê dié wat haar geken het dit is belangrik dat Shiweda nie net onthou word vir hoe sy gesterf het nie, maar vir hoe sy geleef het – as ’n jong Namibiese vrou wat diensbaarheid gekies het, in geregtigheid geglo het en haar verantwoordelikhede met moed gedra het,” het Imalwa gesê.

“Haar nalatenskap leef voort in die sake waarin sy aangekla het, die lewens wat sy geraak het en die kinders wat sy agterlaat.”

Imalwa het Sondag Shiweda se ouerhuis op Onambango besoek en kerse ter ere vir haar aangesteek.

Nakanduungile bly in aanhouding in die Grootfontein-gevangenis hangende die borgtoguitspraak. Hy  word deur Smart Elago verteenwoordig.

– [email protected]