Eagles kan reënweer bedank vir ligapunt teen Skotte

Kwesbare kolfwerk teen die nuwe bal het die FNB Eagles onder druk geplaas in beide hul eerste twee wedstryde as gasheerspan in die driehoekige mini-toernooi in die ICC Wêreldbeker Liga Twee-reeks (2024-2026).Die Namibiërs het Saterdag met drie paaltjies teen Oman verloor, nadat ‘n sterk eindpoging met die kolf die tuisspan tot ‘n totaal van 268 vir sewe aangehelp het.Die Midde-Oosterse besoekers se kolfhelde en ‘n goed berekende kolftempo het hulle egter oor die wenstreep gekry, met vyf balle oor.Willem (WP) Myburgh en Malan Kruger het ‘n versigtige begin teen Oman gemaak totdat Kruger eerste moes terugstap vir 21 lopies van 44 balle (een vier, een ses). Die kolftempo moes egter ‘n betekenisvolle hupstoot kry vanaf 36/1 ná 11.4 boulbeurte.Myburgh het ‘n ankerrol vervul totdat hy vir 43 van 69 balle geboul is, met net ‘n enkele grenshou. Voor hom is Jan Frylinck vir 13 agter die paaltjies uitgevang (29 balle; geen grenshoue).Gerhard Erasmus het hom vir ‘n vyftigtal ingegrawe (54 van 55 balle; 4x4 1x6) totdat hy hom met ‘n omgekeerde veeghou misgis het en uitgevang is.Die steun wat hy van Louren Steenkamp (32 van 48 balle; 2x4) in ‘n 68-vennootskap opgebou is, moes egter van nuuts af begin toe beide in die 41ste boulbeurt uitgehaal is deur Shakeel Ahmed, Oman se voorste paaltjienemer in die reeks. Steenkamp het sy debuut vir Namibië in internasionale eendagkrieket gemaak.Die laaste 10 boulbeurte het vir Namibië 98 lopies vir die verlies van vier paaltjies opgelewer.Die nuwe Eagles-kaptein JJ Smit het drie sesse geslaan voordat hy op die grenstou uitgevang is vir 24 van 17 balle, terwyl ‘n waardevolle 59-vennootskap tussen Zane Green (42 van 22 balle; 6x4 1x6) en Dylan Leicher (30 nie uit nie van 17 balle; 2x4 1x6) gevestig is.Die vereiste kolftempo vir Oman was 5.38, met Namibië wat vroeë hoop gekry het toe die jong regterarm-naatbouler Max Heingo, wat verlede maand 18 jaar oud geword het, van die kaptein Jatinder Singh (11 van 29 balle) asook sy aanvangsvennoot Pruthvikumar Machhi (7 van 10 balle) ontslae geraak het.Dit was Heingo se ODI-debuutwedstryd, ten gunste van Ruben Trumpelmann wat ‘n ruskans gegun is.Heingo het in ‘n later boulskof ook die hardnekkige Wasim Ali (62 van 49 balle; 3x4 2x6) deur Jan Frylinck laat uitvang, om met 3/59 in 9.1 boulbeurt te eindig.Oman se vernaamste kolfheld en speler van die wedstryd was hul 27-jarige nommer vier Hammad Mirza met ‘n deurslaggewende honderdtal (112 van 128 balle; 12x4 1x6).Twee ligapunte vir die oorwinning het vir Oman steeds in die vierde posisie op die algehele puntelys van die reeks gehou, hoewel nou net een punt agter Nederlaad (tweede). Wedstryd 2, onbeslisSkotland se kaptein Richie Berrington het gister die loot gewen en die Eagles ingestuur om eerste te kolf.Kolftoestande het opnuut nie maklik in die oggendsessie gelyk nie, toe WP Myburgh (0 van 10 balle), Malan Kruger (3 van 15 balle), Jan Frylinck (14 van 26 balle; 3x4) en Gerhard Erasmus (8 van 14 balle) die tuisspan ‘n gevoelige verlies op 36/4 ná 13.3 boulbeurte toegedien het.‘n Puik vennootskap van 124 lopies tussen Louren Steenkamp en Zane Green het aan elkeen ‘n vyftigtal besorg. Steenkamp het 78 van 99 balle behaal (6x4 2x6), terwyl Green op 62 van 87 balle (6x4) uitgevang is.In die laaste paar balle voordat ‘n reënbui die wedstryd tot ‘n onbesliste uitslag ge dwing, kon Dylan Leicher (9 van 17 balle), JJ Smit 4 van 8 balle) en Ruben Trumpelmann (3 nie uit nie van 4 balle) nie ‘n grenshou byvoeg nie.Die Namibiërs kan straks dankbaar wees vir die enkele gedeelde ligapunt met Skotland wat goed geplaas sou wees om ‘n beskeie telling te jaag.Laas week se botsing tussen Oman en Skotland kon ook vanweë reënweer nie ‘n uitslag oplewer nie. Volgende by die FNB NCGWoensdag 8 April: Oman teen Skotland (09:30).Vrydag 10 April: Namibië teen Oman (09:30).Sondag 12 April: Namibië tn Skotland (09:30).Die puntestand in die algehele reeks is:1 VSA 36 punte2 Skotland 32 punte3 Nederland 28 punte4 Oman 27 punte5 Kanada 21 punte6 Namibië 20 punte7 Nepal 12 punte8 V.A. Emirate 10 punte

Eagles kan reënweer bedank vir ligapunt teen Skotte

Kommentaar

Republikein 2026-04-07

Meld asseblief aan om kommentaar te lewer

Eagles kan reënweer bedank vir ligapunt teen Skotte

Kommentaar

Republikein 2026-04-07

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.