'Dit is alles waarvoor ek staan'

Haar terugkeer is 'n roeping en om as Mej. Namibië gekroon te kan word, is die uiteindelike verteenwoordiging van alles waarvoor sy staan. So sê die 27-jarige Johanna Swartbooi van Vaalgras in die //Kharasstreek nadat sy Saterdagaand tydens ‘n glansgeleentheid op Ongwediva as vanjaar se Mej. Namibië gekroon is. Johanna, ‘n model met ‘n graad in besigheidsbestuur is in 2019 as tweede prinses tydens die kompetisie aangewys waartydens sy ook as die wenner in die kategorie vir topmodel aangewys is. Sy sal nou haar

geboorteland in November in Thailand op die wêreldverhoog tydens die 74ste Mej. Heelal-kompetisie verteenwoordig. Johanna is ook die stigter van die @hapo_initiative waar sy voorspraak doen vir die bemagtiging van kreatiewe entrepreneurs en jeugbemagtiging. Sedert haar deelname in 2019 aan die kompetisie het sy steeds ‘n pad met Mej. Namibië gestap en in 2021 en 2023 as ‘n motiveringspreker by die slypskole vir die semifinaliste opgetree waar sy haar ervaring, kennis en inspirasie met deelnemers gedeel. In 2023 bied Johanna ook haar dienste agter die skerms by beide die semifinale en finale rondte van die kompetisie aan. Een van Johanna se pryse is ‘n huis wat deur die Nasionale Behuisingsonderneming (NHE) geborg is. Haar eerste prinses is Uatjira Mbaisa wat ook die publiek se gunsteling deelnemer was en Tuilika Andreas is haar tweede prinses. Sien meer oor die kroning op bl.8 van vandag se Market Watch-uitgawe.