Onbevestigde aardbewing wyd gevoel

Verskeie mense in die omgewing van Otjiwarongo, Outjo, Kalkfeld, Uis asook Omaruru sê hulle het gisteroggend net ná 09:00 ‘n ligte aardbewing gevoel.

Die geologiese opname binne die ministerie van myne en energie se Mako Sitale het vanoggend gesê sy kan egter nie die aardbewing bevestig nie, maar dit is ook op Volcano Discovery se webwerf aangemeld deur iemand wat dit gevoel het.

Die webwerf deel ook ‘n seismogram van die siesmiese stasie in Windhoek, wat die bewing klaarblyklik opgetel het. Volgens die webwerf was die episentrum van die aardbewing sowat 10 km diep en het dit sowat een kilometer ver van Omaruru voorgekom. Die episentrum is 56 km noord van Karibib en 72 km noordnoordoos van Usakos.

Omdat die bewing waarskynlik minder as 1,5 op die Richterskaal gemeet het, word dit nie amptelik as ‘n aardbewing aangeteken nie.

Op die Facebook-groep “Goeie of Slegte Diens Otjiwarongo” het 31 mense gesê hulle het die aardbewing gevoel – ook so ver as op Uis, Outjo en Kalkfeld. Talle sê hulle het dit “gehoor én gevoel”, terwyl ander meen dit kom van die dorp se nabygeleë sementfabriek af.