Uitstalling verken materiële herinneringe

Die Namibiese kunstenaar Lynette Musukubili omskep herwonne plastiek in boeiende kunswerke in haar jongste solo-uitstalling, Material Memories, wat op 18 Julie by die Project Room geopen het.

Sy gebruik gehekelde muurtapisserieë en beeldhouwerke om temas soos herinnering, identiteit en die alledaagse lewe te verken.

Die uitstalling lui ’n nuwe hoofstuk in Musukubili se kreatiewe reis in. Terwyl haar vorige werk op kinderherinneringe gefokus het, ondersoek sy nou die mense, verhoudings en ervarings wat haar huidige lewe vorm.

Kunsliefhebbers sal haar solo-uitstalling van 2023, Bukalo Stories, onthou, wat inspirasie uit haar kinderjare in Bukalo, ’n afgeleë dorp in die Zambezistreek, geput het.

Terwyl dié uitstalling teruggekyk het na die tradisies en herinneringe wat haar identiteit gevorm het, fokus haar nuwe versameling doelbewus op die hede.

Musukubili, wat tans voltyds in Windhoek woon en werk, beskryf haar jongste werke as ’n visuele dagboek waarin sy die mense wat sy ontmoet, die verhoudings wat sy bou en die alledaagse oomblikke wat haar lewe beïnvloed, vasvang.

Die kern van die uitstalling lê in haar vernuwende gebruik van herwonne plastieksakke. Materiaal wat andersins weggegooi sou word, word sorgvuldig gesny, gevorm en gehekel tot muurtapisserieë en beeldhouwerke met ’n ryk tekstuur.

Deur ’n proses wat tradisioneel met sorg, geduld en huishoudelike vakmanskap geassosieer word, gee Musukubili nuwe betekenis aan afvalmateriaal, terwyl sy terselfdertyd die omgewingsuitdagings beklemtoon wat plastiek inhou. Haar voltooide werke dien as beide kunswerke én persoonlike argiewe. 

Sedert die sukses van Bukalo Stories het Musukubili se loopbaan steeds momentum opgebou. Haar werk is reeds by toonaangewende kunsgeleenthede soos die Investec Cape Town Art Fair en die RMB Latitudes Art Fair in Johannesburg uitgestal, waar dit aan ’n breër gehoor bekend gestel is. Ten spyte van hierdie groeiende internasionale erkenning bly haar werk diep gewortel in die alledaagse werklikheid van Namibië. 

– [email protected].za