Strokiesprente, anime en ek

Dis amptelik, ek is op die medialys vir Comic Con Afrika (CCA) 2025 en daar is geen manier dat ek dit kan misloop nie.CCA is oor bietjie meer as ’n maand en weer eens sal ek Namibië as verslaggewer gaan verteenwoordig. Die geleentheid vind in Johannesburg vanaf 18 tot 31 Augustus plaas. Woorde kan nie beskryf hoe opgewonde ek oor vanjaar se geleentheid is nie. Volgens wat ek tot dusver gesien en hoor het, is daar baie wat vanjaar se Comic Con spesiaal gaan maak. Ek weet nie of almal weet wat ’n “comic con” is nie. Dis die grootste popkultuurfees in Afrika; dis waar film-, strokiesprent-, anime-, cosplay- en kunsaanhangers bymekaarkom om alles wat ons liefhet te vier. Dis ’n vier dae lange jol met verskeie panele en bekende gaste. Dis nie net ’n fees nie, maar ook ’n leerskool vir mense wat in die vermaaklikheidsbedryf wil werk.Comic Con is een van die hoofredes waarom The Movie Guy vandag bestaan. Dis waar my passie vir popkultuur en rolprente gegroei het. Ek onthou nog my eerste Comic Con in 2019, en vir die eerste keer het ek gevoel ek behoort iewers. Geleenthede soos dié skep platforms waar almal bymekaar kan kom en hul drome in ’n soort fiksiewêreld kan uitleef.Dit maak nie saak of jy van Superman, Goku of WWE hou nie, daar is iets vir jou. Dis waar alles in popkultuur bymekaarkom. Ek het vriende met die “coolste” mense gemaak en terselfdertyd kon ek baie leer. Die Movie Guy is ’n inhoudskepper en die beste inhoud word by Comic Con gevind. Ek wou nog altyd by die filmbedryf betrokke raak en by Comic Con is enigiets moontlik. Ek het al oor die jare bekende akteurs en regisseurs by CCA ontmoet. Vanjaar sien ek daarna uit om akteurs soos Misha Collins en Jessie T. Usher te ontmoet en hopelik kan ek ’n onderhoud of twee met hulle voer.As ’n verslaggewer beteken dit ook ek kan ’n ding of twee oor die internasionale media gaan leer. Verslaggewers van oraloor die vasteland woon gewoonlik die geleentheid by en dit is inspirerend om te sien hoe hulle te werk gaan. Comic Con is ’n leerskool vir enigiemand in die mediabedryf, die pret is net ’n bonus.Om ’n lid van die media te wees, laat my toe om die beste dele van die geleentheid met ons lesers en ook met my sosialemediagehoor te deel. Dit beteken ek kan foto’s, video’s en agter-die-skerm-onderhoude op verskeie platforms publiseer. Vanjaar is ook die eerste keer dat ek direk van die CCA-vloer af regstreeks op Instagram en TikTok gaan stroom.Om dit moontlik te maak, is ek besig met ’n geldinsameling om die koste van die reis te dek. Die organiseerders dek net die kostes terwyl ek by die geleentheid is (soos die kaartjie en kos), dinge soos vervoer en verblyf moet ek self betaal. As jy graag tot my geldinsameling wil bydra of help om die woord te versprei, sal ek ongelooflik dankbaar wees. Stuur ’n epos na themovieguy.nam@gmail.com of stuur ’n direkte boodskap op Instagram na @themovieguy_nam. Ek sien verskriklik uit na Comic Con en ek kan nie wag om daar te werk nie.– themovieguy.nam@gmail.com

Strokiesprente, anime en ek

Kommentaar

Republikein 2025-11-04

Meld asseblief aan om kommentaar te lewer

Strokiesprente, anime en ek

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.