Nuwe Lof wil lofsanggroepe oplei

Kerksangleiers en -musiekspanne sal op 6 en 7 Junie ’n opleidingsgeleentheid saam met onder meer Louis Brittz en Retief Burger by die New Life Center in Windhoek kan bywoon as deel van die Nuwe Lof Konferensie-inisiatief. Dié inisiatief is daarop gemik om nuwe Afrikaanse lofprysingsmusiek te skep, op te neem en hulpmiddele daarvoor aanlyn beskikbaar te stel. Ongeveer 25 liedjieskrywers en 1 500 Afrikaanse kerke en selgroepe vorm deel hiervan. “Om in die kerk sang te lei en musiek te maak behoort ‘n groot vreugde te wees, maar dis dikwels ‘n roeping met baie frustrasies. Een groot rede hiervoor is dat daar min goeie opleiding vir hierdie belangrike taak beskikbaar is,” sê Brittz. “Elke generasie het ’n klank; ’n kreet. Elke nuwe geslag dink en droom in nuwe idiome en so word ons gedigte en liedere ook vernuwe. “Ons wil ons allerbeste vir God gee (dis wat ware aanbidding behels) en daarom antwoord ons op die roepstem om nuwe liedere in Afrikaans te skep,” sê hy oor die dryfkrag agter Nuwe Lof.“Retief, Louis en hul noue medewerkers besef egter dat goeie musiek net een deel van ’n gesonde aanbiddingskultuur in ’n gemeente is. “Die sangers, musikante en tegniese vrywilligers moet verstaan hoe om saam musiek te maak en dit goed te laat klink vir ’n groep mense om lekker te kan sing en die Here op ’n intieme manier te kan aanbid,” lui ’n verklaring van Nuwe Lof. Brittz en Burger sal Windhoek besoek, saam met onder meer Stass (Onbeskaamd) en Zaretha van Wyk, met die doel om plaaslike lofsanggroepe op te lei. “Die groep aanbieders spreek velerlei elemente van die onderwerp aan, van geestelike en emosionele gereedheid tot die praktiese aanwending van sang, instrumentasie en tegnologie. “Werkwinkels in sang, klawerbord, kitaar en elektriese kitaar word aangebied en daar is baie geleenthede vir samesang,” sê die verklaring. ’n Lofsangaand word ook Vrydagaand 6 Junie gehou waarna lede van die publiek genooi word.Inskrywings vir Nuwe Lof kan by www.nuwelof.co.za gedoen word.– republikein@republikein.com.na

Nuwe Lof wil lofsanggroepe oplei

Kommentaar

Republikein 2025-09-18

Meld asseblief aan om kommentaar te lewer

Nuwe Lof wil lofsanggroepe oplei

Kommentaar

Republikein 2025-09-18

Meld asseblief aan om kommentaar te lewer

MELD AAN

Advertensie