’n Wêreld waar musiek, mode en die storie saambestaan

Vir die Namibies-gebore Margot Rothman is kreatiwiteit nie iets wat net in een vorm bestaan nie. As musikant, liedjieskrywer, modeontwerper en inhoudskepper glo sy nie sy hoef tussen haar passies te kies nie. Inteendeel – haar beste werk ontstaan wanneer musiek, mode, film en storievertelling saamvloei.“Ek het lank met die idee geworstel dat ek ernstig op net een loopbaan moet fokus,” vertel sy. Met verloop van tyd het sy besef dié idee is verouderd. Vir haar loop mode en musiek natuurlikerwys hand aan hand: van die ontwerp van ’n rok en uitvoering van ’n liedjie tot die verfilming van ’n musiekvideo.Musiek is al sedert haar kinderjare deel van Margot se lewe. Sy het in ’n musikale familie grootgeword, met ’n pa wat klavier speel, ’n musikaal begaafde suster en haar broer, Loki Rothman, wat self ’n gevestigde musikant is. Vandag is hy ook haar vervaardiger.Alhoewel daar ’n ouderdomsverskil van nege jaar tussen Margot en Loki is, beskryf sy hul musikale verhouding as besonder spesiaal. Hulle deel ’n vertrouensband en ’n verwysingsraamwerk, wat beteken dat hy dikwels verstaan waarna sy soek voordat sy dit ten volle kan verduidelik. Tog is sy vasbeslote om haar eie identiteit as kunstenaar te vestig. Die woorde, gevoelens en melodieë waarmee sy werk, is haar eie.Haar eerste groot tree het gekom met haar weergawe van “Toe Vind Ek Jou” vir Fiela se Kind. Die ervaring het haar aan ’n groter gehoor bekend gestel en gewys hoe kragtig musiek en film saam emosie kan vasvang.Vandag beskryf Margot haar klank as emosionele, filmiese alternatiewe pop met ’n sterk Afrikaanse identiteit. Haar musiek het met verloop van tyd meer volwasse, eerlik en doelbewus geword. Volgens haar bied Afrikaans ’n besonderse rouheid en intimiteit wat haar in staat stel om emosies uit te druk sonder dat enige verduideliking nodig is.Sy wil ook nie vir luisteraars voorskryf wat haar musiek moet beteken nie. Haar grootste wens is eenvoudig dat iemand iets voel – dalk selfs die besef dat ’n emosie wat hulle alleen gedra het, deur iemand anders raakgesien word.Mode is ’n natuurlike verlengstuk hiervan. Margot gebruik klere om die atmosfeer van haar musiek verder oor te dra. Sy beskryf haar estetika as romanties en “cinematic” en put inspirasie uit onder meer Schiaparelli se couture en kunstenaars soos Raye en Olivia Dean. As sy geen beperkings gehad het nie, sou sy graag vir elke optrede ’n nuwe uitrusting wou skep en ’n amperse Broadway-ervaring na die verhoog bring.Kaapstad speel ook ’n belangrike rol in haar kreatiewe wêreld. Die stad se son, see, berge, wynplase en uiteenlopende mense bied eindelose inspirasie. As ’n selferkende “people watcher” fassineer mense en hul stories haar veral.Agter die kreatiewe energie skuil daar egter ook ’n introspektiewe kant. Margot beskryf haarself as ’n ambivert en sê die persoon wat mense op sosiale media sien, is nie altyd dieselfde persoon wat hulle in die werklike lewe ontmoet nie. Sy leer toenemend dat kreatiwiteit nie dieselfde as produktiwiteit is nie en dat stilte en die gewone lewe net so belangrik vir die kreatiewe proses is.Met ’n eerste volledige album, nuwe musiek, groter optredes en selfs haar eie kortfilm – vertel deur middel van musiekvideo’s – in die vooruitsig, is daar nog baie wat Margot wil ontdek. Haar doel is om musiek, mode en storievertelling op 'n toenemend doelbewuste manier bymekaar te bring.As sy een ding vir haar jonger self kon sê, sou dit wees: Hou op om te wag totdat jy voel jy het toestemming. Jy hoef nie volkome seker, selfversekerd of gereed te wees voordat jy begin nie.Vir Margot is die pad vorentoe dus nie ’n reguit lyn nie, maar ’n groeiende kreatiewe wêreld waarin sy ruimte laat vir al haar passies en vir die mens wat sy steeds besig is om te word. – annemarie@capetvproductions.co.za

’n Wêreld waar musiek, mode en die storie saambestaan

Kommentaar

Republikein 2026-10-09

Meld asseblief aan om kommentaar te lewer

’n Wêreld waar musiek, mode en die storie saambestaan

Kommentaar

Republikein 2026-10-09

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.