’n Viering van vrouwees

Die bekroonde kunstenaar en woordsmid Lidi de Waal en die geliefde sangeres en liedjieskrywer Petronel Baard span vandeesmaand kragte saam vir Vrou, Vrouer, Vrouste – ’n unieke teaterproduksie wat humor, musiek, poësie en die kuns van storievertelling verweef in ’n viering van vrouwees en menslikheid.Die produksie, wat reeds gehore by verskeie feeste en dorpe in Suid-Afrika aangegryp het, maak nou haar debuut op Namibiese planke. Deur woordkuns, oorspronklike musiek en eerlike lewenservarings te kombineer, neem die vertoning gehore op ’n reis van lag, trane, hoop en selfontdekking.“Dis ’n snaakse, hartseer, hopelose, hoopvolle woord-, kuns- en musiekreis na jou vreedsame self,” beskryf Lidi die produksie.Volgens die twee kunstenaars is Vrou, Vrouer, Vrouste veel meer as net vermaak. Dis ’n eerlike verkenning van menslike emosies, die uitdagings van die lewe en die skoonheid wat dikwels in ons eie onvolmaakthede skuil.“Ons kan uit ’n vroulike perspektief praat,” sê Petronel. “Ons praat onder meer oor menslike emosies, soos wanneer jy mense moet seermaak as jy nie wil nie, of wanneer jy self seerkry. Dit is ’n persoonlike konsert sonder om té persoonlik te raak.”Lidi beskryf die produksie as ’n skets van “perfekte imperfeksies” en ’n uitnodiging om eerlik na onsself te kyk. Haar werk het oor die jare duisende mense aanlyn geraak deur haar vermoë om gevoelens en ervarings in woorde vas te vang wat diep aanklank vind.Dié veelsydige kunstenaar is bekend vir haar poësie, skilderye en beeldhouwerke, asook haar gewilde aanlyn teenwoordigheid waar sy gereeld haar kuns en gedagtes deel. Haar werk fokus dikwels op die eenvoudige vreugdes van die lewe – familie, troeteldiere, liefde en die klein oomblikke wat betekenis aan elke dag gee.Een van Lidi se gedigte lui:“lately beleef ek soms tyewaar die lewe net perfek isnie die soort perfekwaar niks verkeerd is niemaar die soort perfekwaar al die verkeerdrêrig nie eintlik meer saakmaak nie.”Aan die musikale kant bring Petronel dekades se ervaring na die verhoog. Die sangeres, wat haar liefde vir musiek as kind op Villiersdorp in Suid-Afrika ontdek het, het die ATKV-Crescendo-sangkompetisie in 1999 gewen – ’n prestasie wat die begin van haar professionele loopbaan aangedui het.Sy het sedertdien verskeie albums en enkelsnitte uitgereik en honderde optredes gelewer. Petronel put inspirasie uit die natuur, mense en die alledaagse lewe en is ewe tuis op intieme teaterverhoë as op groot feesterreine.Vir Vrou, Vrouer, Vrouste het Petronel ’n splinternuwe album geskep wat op Lida se poësie gebaseer is, aangevul deur oorspronklike musiek uit haar eie pen. Die album sal eksklusief tydens die vertonings te koop wees.Namibiërs kan die produksie op twee geleenthede geniet. Die FNB Windhoek Woordfees bied op Vrydag 26 Junie die vertoning om 18:30 by die Beach Hotel in Swakopmund aan, terwyl gehore in die hoofstad dit op Saterdag 27 Junie om 13:30 by Droombos buite Windhoek kan geniet.Kaartjies kos N$300 per persoon, terwyl pensioenarisse slegs N$250 betaal. Verversings sal ook tydens die vertonings beskikbaar wees.Vir almal wat wil lag, besin, ontroer word en dalk hulself ’n bietjie beter wil leer ken, beloof Vrou, Vrouer, Vrouste om ’n besondere ervaring te wees – ’n viering van vrouwees, kreatiwiteit en die gedeelde menslike ervaring.– annemarie@nma.com.na

’n Viering van vrouwees

Kommentaar

Republikein 2026-09-17

Meld asseblief aan om kommentaar te lewer

’n Viering van vrouwees

Kommentaar

Republikein 2026-09-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.