Mario en Luigi vermaak gehore wêreldwyd

As jy op soek is na flieks om die hele gesin te vermaak, dan moet The Super Mario Galaxy Movie bo-aan dié lys wees.Dit is tans die nommer 1-fliek in die wêreld en dit is omdat gehore mal daaroor is. Dis nie ’n fliek wat ’n diep betekenisvolle storie wil vertel nie. Dis eenvoudig ’n fliek wat die hele gesin saam kan geniet. Dit is aksiebelaai en die storie is eenvoudig. Daar is nie veel om in hierdie fliek te ontleed nie, behalwe dat dit hulde aan Nintendo-videospeletjies bring.In die rolprent word prinses Rosalina deur Bowser jr. ontvoer. Prinses Peach besluit dan sy moet die ander prinses gaan red. Mario en Luigi sit hand by en hulle word deur hul nuwe vriend, Yoshi, vergesel.Ek weet nie of mense nog steeds kwaad is dat Chris Pratt, Mario speel nie, maar ek hou van hom in die rol. Charlie Day is weer eens uitstekend as Luigi asook die res van die rolverdeling, insluitend Keegan-Michael Key as Toad.Natuurlik is Anya Taylor-Joy perfek as Peach. Die fliek sou net nie gewerk het sonder Jack Black as Bowser nie, en ek is bly hy is terug.Benny Safdie speel Bowser jr., en eerlikwaar, ek hou van wat hy met die karakter se stem doen. Dit kom dreigend voor, maar terselfdertyd kwesbaar en soms kinderlik. Yoshi word deur Donald Glover vertolk, en al sê die karakter nie regtig baie nie, dink ek hy was die perfekte keuse. Glen Powell speel Fox McCloud, ’n rol waarvoor hy gebore is. Prinses Rosalina word deur Brie Larson vertolk, en ek dink sy pas perfek by die rol. Sy is mal oor die Super Mario- en Nintendo-speletjies, so dit maak sin dat sy haar beste spel sou lewer.Ek weet hierdie fliek het ’n sterk rolverdeling, maar die kort speeltyd laat nie regtig baie ruimte vir karakterontwikkeling nie. ’n Deel van my verstaan dat hulle net ’n vermaaklike rolprent wou maak, maar ’n bietjie meer tyd saam met hierdie karakters sou wonders verrig het. Ek sou veral meer van Yoshi wou weet, hy is net te oulik.Wat die storie kortkom, maak dit op met visuele effekte. Die fliek gebruik verskeie animasiestyle om verskillende tonele uit te beeld.Dit vier ook die speletjies deur ’n paar tonele by te voeg wat lyk asof dit reguit uit ’n Super Mario Bros. 8 bis-videospeletjie kom. Dis nie al nie, ons kry ook ’n paar 2D-geanimeerde tonele, wat ek dink goed gedoen is.Die fliek word The Super Mario Galaxy Movie vir ’n rede genoem. Ons sien wêrelde in hierdie heelal wat eenvoudig ongelooflik op die grootskerm lyk. Dit dra alles by tot die opwinding van die fliek en maak ook die deur vir nuwe stories binne hierdie filmreeks oop.Oor die algemeen dink ek die fliek is net goeie vermaak. Dis snaaks en dit bring beslis ’n paar kinderherinneringe terug. Ek moet wel ’n paar punte vir die swak storie en die onnodig kort speeltyd aftrek. Ek weet sommige filmkritici hou nie van hierdie fliek nie, maar dit is nie vir hulle nie. Dit is vir die “gamers”, die aanhangers van Super Mario, en al die kinders wat nog van flieks hou. Ek gee The Super Mario Galaxy Movie 3 uit 5 sterre.– themovieguy.nam@gmail.com

Mario en Luigi vermaak gehore wêreldwyd

Kommentaar

Republikein 2026-08-03

Meld asseblief aan om kommentaar te lewer

Mario en Luigi vermaak gehore wêreldwyd

Kommentaar

Republikein 2026-08-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.