Kollig-kalender

VANDAG

* Girls Just Wanna Have Fun vind van 18:00 tot 20:00 by BodyworX Women’s Fitness Studio plaas. Hierdie opwindende neon-fiksheidspartytjie in 80’s-styl, aangebied deur Fusion Flex en moontlik gemaak deur BodyworX, kombineer fiksheid, dans en hope pret. Vroue kan una ’n energieke aand van oefening, lag en nostalgie uitsien, terwyl hulle terselfdertyd ’n goeie doel ondersteun. Kaartjies kos N$200.

—---------------------

MôRE

* Die Botaniese Vereniging van Namibië nooi die publiek uit om aan ’n begeleide staptoer – van 08:30 tot 11:00 – deel te neem, waar besoekers meer oor Namibië se unieke plantelewe kan leer, interessante aktiwiteite kan geniet en die Nasionale Botaniese Tuin en die Nasionale Botaniese Navorsingsinstituut saam met ander natuurliefhebbers kan verken. Die koste vir deelname is N$30.

**********

* Die NTN Stage Actors Training Lab 2026 begin om 09:00 by die Nasionale Teater van Namibië. Dié intensiewe praktiese opleidingsprogram vir aspirant- en professionele akteurs bied opleiding in toneelspel, stemwerk, beweging, karakterontwikkeling en professionele groei, onder leiding van ervare teaterpraktisyns. Die losstaande kursusse word elke Saterdag van 09:00 tot 13:00 aangebied en bied deelnemers die geleentheid om hul vaardighede te ontwikkel en te verfyn. Deelname beloop N$50.

**********

* Die Vyfde Jaarlikse Vrouekonferensie vind van 10:00 tot 13:00 by die SeaSide Hotel & Spa in Swakopmund plaas. Die konferensie bring vroue van oraloor die land bymekaar vir ’n dag van bemoediging, aanbidding en geestelike groei. Belangstellendes word aangemoedig om die datum op hul kalenders aan te teken, met verdere besonderhede wat binnekort bekend gemaak sal word. Toegang is gratis.