Jong talent op die loopplank

’n Droom het in 2014 vir Daphne Voigts waar geword toe sy die kans gekry het om in een van Suid-Afrika se grootste modelskole in te koop.

Sedertdien het die skool gegroei en takke op Grootfontein en Tsumeb sowel as twee kustakke in Walvisbaai en Swakopmund geopen.

ACE Models het 28 takke oraloor Suid-Afrika en het ’n internationale modelskool geword toe Voigts die Namibiese tak geopen het.

In 2021 het die modelakademie hulle vlerke verder gesprei en nog ’n tak in Australië oopgemaak.

As deel van die ACE Models se plaaslike kurrikulum neem die modelle in wording jaarliks aan die Mnr. en Mej. ACE Model Namibia-skoonheidskompetisie deel.

Dié kompetisie is weer vandeesmaand op 11 Junie by Windhoek Gimnasium se skoolsaal aangebied, waar modelle tussen die ouderdomme van vier en 22 deelgeneem het.

Die beoordelaars was almal voormalige Mej. Namibië-wenners, naamlik Nadja Breytenbach (2019 en 2020), Selma Kamanya (2018), Luzaan van Wyk (Visser) (2011) en Odile Gertze (2010).

Lizelle Esterhuizen, ’n voormalige ACE-model en Mej. Namibië 2016, het vooraf onderhoude met die modelle gevoer. Die punte wat vir die onderhoude aan hulle toegeken is, is by dié gevoeg wat hulle op die aand van die kompetisie vir hul loopplankvaardighede ontvang het.

Nadat die topvyf in die onderskeie ouderdomsgroepe gekies is, is die finaliste se algemene kennis beproef deur hulle vrae op die verhoog te laat beantwoord.

Almal kon in een van twee groepe deelneem, naamlik beginners en gevorderd.

Vir party deelnemers was dit die eerste keer op ’n loopplank, en dít boonop voor so baie toeskouers – iets wat glo die aspirantmodelle se selfvertroue omtrent ’n hupstoot gee.

DIE WENNERS

*BEGINNERS

Klein Mej. ACE Model Namibia: Zulieka de Langen

1ste Prinses: Ena Iyaloo Iipinge

2de Prinses: Jessica Andreas

Junior Mej. ACE Model Namibia: Meiling Andreas

Voortiener Mej. ACE Model Namibia: Gabriela Teixeira

1ste Prinses: Ronique Goncalves

2de Prinses: Chantel Boeren

Mej. Fotogenies: Chantel Boeren

Tiener Mej. ACE Model Namibia: Taryn Koff

1ste Prinses: Makayla Buys

2de Prinses: Jolie Mutambo

Mej. Fotogenies: Laurell Hendrickse

Senior Mej. ACE Model Namibia: Chante van Wyk

1ste Prinses: Beatrix Hamann

2de Prinses: Kyla Swartz

Mej. Fotogenies: Chante van Wyk

*GEVORDERD

Junior Mej. ACE Model Namibia: Chrislee Durand

1ste Prinses: Laliq Adams

Mej. Fotogenies: Chrislee Durand

Voortiener Mej. ACE Model Namibia: Lulu van Rhyn

1ste Prinses: Maya Grobler

Mej. Fotogenies: Maya Grobler

Tiener Mej. ACE Model Namibia: Shane Venter

1ste Prinses: Kelly-Ann Scholtz

2de Prinses: Lelita Esterhuizen

Mej. Fotogenies: Shane Venter

Senior Mej. ACE Model Namibia: Kelly-Ann Basson

1ste Prinses: Quintina Tjizumaue

2de Prinses: Ndeshipewa Angula

Mej. Fotogenies: Kaylinn Bock

ANDER PRYSE

Beste droombord: Daneille Beukes

Beste onderhoud: Wardah Cupido

Beste loopplank: Ndeshipewa Angula

Beste “pageant”: Wardah Cupido

Besgeklede: Beatrix Hamman

Direkteurskeuse (iemand wat “die ekstra myl gaan”): Chante van Wyk

“Net soos elke rugbyspeler daarvan droom om eendag ’n Springboktrui oor sy kop te trek, só droom elke model daarvan om eendag ’n internasionale loopplank saam met groot name in dié bedryf te deel.

“Ons eie Behati Prinsloo het ’n groot deurbraak gekry en is vandag ’n Victoria’s Secret Angel. Ek wil elke model help om die beste weergawe van hulself te wees, om die wêreld vierkantig in die oë te kyk en trots te wees op wie en wat jy is - al is dit nie ’n Victoria’s Secret Angel nie,” sê Voigts.

Sy benadruk dat hierdie jongmense ook lewensvaardighede by ACE Models leer, soos hoe om vir ’n onderhoud aan te trek, hetsy vir ’n werksonderhoud of skoonheidskompetisie, hoe om hard en duidelik te praat en watter beeld om na buite te dra – in die sosiale media en in die regte lewe.

“By ACE Models glo ons met harde werk en toewyding sal jou drome bewaarheid word.”

Die volgende groot geleentheid is in Augustus by ACE Models se jaarlike konferensie waar ongeveer 500 ACE modelle van alle takke bymekaarkom en die loopplank baasraak, en waar hulle die geleentheid het om by modelagentskappe te teken.