Hartklop en kitare

Die bekroonde Namibiese musikant en liedjieskrywer Riaan Smit het amptelik sy vierde ateljee-album, Electric Nomad, vrygestel –  ’n ambisieuse album met 14 snitte wat reeds lof ontvang het vir sy diepte, oorspronklikheid en musikale omvang.

In ’n tyd wanneer kort snitte en enkelsnitte die toon aangee, kies Electric Nomad doelbewus ’n alternatiewe pad.
Volgens Riaan is die album ’n terugkeer na storievertelling en musikale reise, ’n formaat wat hy meen in die moderne stromingsera verlore geraak het. Hy sê die album moet as ’n geheel ervaar word, eerder as in afsonderlike stukkies. 

Die album ontvou as ’n deurlopende narratief en verweef uiteenlopende invloede soos surf rock, blues, funk en Afrika-geïnspireerde ritmes. 

Ten spyte van die verskeidenheid in genre behou Electric Nomad ’n oortuigende emosionele en klankidentiteit wat die luisteraar van begin tot einde dra.

Een van die persoonlikste elemente van die album lê in sy oorsprong: Gedeeltes van die musiek is geskep met die hartklop van Riaan se dogter, wat in ritmiese en tekstuurlae omskep is. Hierdie intieme detail gee die album ’n diep menslike element wat dit van meer konvensionele ateljeeproduksies onderskei.

Die vrystelling bevestig verder Riaan se reputasie as een van Namibië se voorste liedjieskrywers van sy generasie, met sy werk wat plaaslik en internasionaal aanklank vind. 

Benewens sy solo-loopbaan is hy ook die voorsanger van Crimson House, wat wyd beskou word as een van Suid-Afrika se voorste verhoogvermaak (live acts). 

Crimson House het reeds vier ateljee-albums uitgereik, wat Riaan se totale produksie op agt volledige albums te staan bring. Hy het ook ongeveer 140 amptelik vrygestelde liedjies op sy kerfstok.

Terwyl Namibië sy plek op die wêreld se kulturele kaart verder uitkerf, dien Electric Nomad as bewys van die land se musikale diepte en waarom Riaan Smit ’n naam is waarop Namibiërs trots kan wees.

Electric Nomad is nou beskikbaar op alle groot stromingsplatforms, Apple Music en as ’n volledige album op YouTube. – [email protected]