Ena Venter postuum vereer

Die Nasionale Teater van Namibië (NTN) het die ontslape koorleier en stigter van die Mascato-jeugkoor, Ena Fouché Venter, die afgelope naweek postuum met ’n lewensprestasie-toekenning tydens die 2026 Blended Voices-koorkompetisie vereer.

Die toekenning is ter erkenning van haar buitengewone en jarelange bydrae tot koormusiek en musiekonderrig in Namibië. 

Venter het haar onderwysloopbaan by die Laerskool Suiderhof in Windhoek begin, waar sy reeds vroeg haar liefde vir musiek en koorsang met jong leerlinge gedeel het. Sy het later as dosent en departementshoof by die Kollege vir die Kunste (Cota) gewerk, waar sy ’n belangrike rol in die opleiding en ontwikkeling van talle jong musikante gespeel het. 

Later as onderwyseres by Windhoek Hoërskool (WHS), waar haar liefde vir koormusiek voortgeduur het, het sy generasies musikante geïnspireer.

In 1996 het sy die Mascato-jeugkoor in Swakopmund gestig, wat meer as 2 000 sangers se lewens geraak en internasionale erkenning verwerf het. Dié koor het vinnig bekendheid verwerf as een van Namibië se voorste jeugkore. 

Onder Venter se leierskap het die Windhoek-kinderkoor en die Mascato-koor groot sukses behaal en internasionale erkenning geniet. Die kore het verskeie oorsese toere onderneem en lande soos Israel, Duitsland en Kanada besoek. Dié geleenthede het nie net Namibiese talent aan die wêreld ten toon gestel nie, maar ook jong sangers die kans gegee om internasionale ervaring op te doen.

Venter se belangstelling in koormusiek het reeds gedurende haar skooljare begin. Sy het haarself toegewy om koormusiek, stemtegniek en dirigering te studeer en het voortdurend daarna gestreef om haar kennis uit te brei. 

Haar bekwaamheid het daartoe gelei dat sy later ook die leisels van die Suid-Afrikaanse Koorvereniging oorgeneem het.

Selfs ná haar aftrede het Venter baie van haar tyd en energie aan die Mascata-jeugkoor gewy. In 2011 het sy die leisels aan Theo Cookson, wat jare lank een van haar koorlede was, oorhandig.

Haar nalatenskap leef voort deur die stemme wat sy gevorm en die gemeenskappe wat sy deur musiek gebou het. – [email protected]