Die einde van die fliekbedryf?

Is die filmbedryf op ’n afdraande pad? Dalk, maar hy is darem nog ver van sy einde af.Die afgelope paar maande het talle rolprentteaters wêreldwyd hul deure gesluit, want kaartjieverkope het tot stilstand gekom. In ons buurland, Suid-Afrika, het drie Ster-Kinekor-teaters hul laaste flieks vir 2025 gewys.Nadat die drie takke gesluit het, was daar ’n beroep van die publiek dat fliekteaters weer oopgemaak moet word. Dis ’n bewys mense wil steeds ’n fliek op die silwerskerm sien, maar wat veroorsaak dat hulle nie die moeite doen om kaartjies te koop nie? Kom ons gesels ’n bietjie.Die idee vir die rubriek het ontstaan uit ’n vraag wat iemand my op Instagram gevra het, en omdat ek so passievol oor flieks en popkultuur is, voel ek dat ek my mening moet deel. Die persoon wou by my weet of ek dink dat rolprentteaters en die filmbedryf besig is om uit te sterf? Die maklike antwoord is nee.Flieks gaan nie dood nie. . . maar die bedryf is wel op ’n laagtepunt.Ek weet nie wie hierdie gaan lees nie, maar ek hoop rolprentvervaardigers sien dit raak. In baie gevalle verstaan fliek-”base” nie meer die moderne kykers nie. Hulle luister nie na die fliekliefhebbers nie en ek verstaan, jy kan nie almal gelukkig hou nie.Goeie bemarking is die beste manier om mense na die teaters te lok. Ek glo die beste bemarkingsinstrument was en sal altyd mond-tot-mondreklame bly. Almal hou van lokprente of goeie promosiemateriaal, maar dit beteken nie hulle sal kaartjies koop nie. Die ekonomie druk en ons wil nie geld op ’n drie uur lange film bestee nie, tensy dit spesiaal is. Ek dink die belangrikste ding wat Hollywood moet besef, is dat minder meer is. Daar word elke week té veel lokettreffers vrygestel. Die films kry skaars kans om ’n gehoor te lok, dan is daar nog een. Onthou jy nog toe ’n groot fliek soos ’n moet-sien-geleentheid gevoel het? Nou is daardie magie weg. Té veel films is nie goed vir die loket nie. Nog ’n groot fout is die feit dat rolprente net ’n paar weke ná vrystelling reeds op digitale platforms of stromingsdienste geplaas word. Waarom sou ek betaal om dit in die teater te gaan kyk as ek dit binnekort in die gemak van my sitkamer kan kyk?Ek verstaan hierdie veranderinge is tydens die pandemie gemaak, maar dit is nou tyd om weer van koers te verander. Ek wil weer betower word wanneer ek ’n filmteater binnestap. Dit raak ook baie vervelig as elke fliek net ’n nuwe weergawe van ’n vorige een is. In Julie is daar drie “blockbusters” wat uitkom, maar dit voel glad nie so nie. Hulle word ook te naby aan mekaar uitgereik.Om alles te kroon, is al drie vervolgflieks of herverwerkings. Hollywood móét met nuwe idees vorendag kom. Hulle dink mense sal nie in iets nuuts belangstel nie, maar een van vanjaar se beste flieks is Sinners. Ons het meer filmmakers soos Ryan Coogler nodig wat mense met iets nuuts oortuig. So nee, die filmbedryf gaan nie dood nie, maar dit is besig om stadig maar seker te misluk. As ’n fliekliefhebber hou ek daarvan om bioskoop toe te gaan. Ek raak steeds opgewonde om in ’n fliekteater te wees, maar baie mense voel nie meer so nie. Dit is iets wat ons móét verander, anders is dit regtig die einde van die filmbedryf. – themovieguy.nam@gmail.com

Die einde van die fliekbedryf?

Kommentaar

Republikein 2025-07-01

Meld asseblief aan om kommentaar te lewer

Die einde van die fliekbedryf?

Kommentaar

Republikein 2025-07-01

Meld asseblief aan om kommentaar te lewer

MELD AAN

Advertensie