Delf in die argiewe van Namibiese godsdiens

Die boek God’s Feet or the Mission’s Pack Donkey Evangelists of Namibia deur Hans-Martin Milk word vanaand amptelik bekend gestel. Die geleentheid word aangebied deur die Jane Katjavivi Argief-restourasieprojek.Die titel van hierdie boek is afgelei van die wyse waarop Namibiese evangeliste hulself (in hulle eie woorde) beskryf het. Afrika-evangeliste van die Rynse Sendinggenootskap (RSG) het ’n deurslaggewende, maar meestal oorgesiene rol gespeel in die vorming van die geestelike en sosiale netwerke wat inheemse gemeenskappe vanaf die vroeë negentiende eeu beïnvloed het. Die skrywer maak gebruik van ’n wye reeks Duitse, Namibiese en Suid-Afrikaanse argiefbronne wat aangevul is met ’n groot aantal onderhoude, om die geskiedenis van die inheemse evangeliste van die RSG te verken.Afrikane was dikwels die eerste aankondigers van die nuwe godsdiens by afgeleë dorpies en veeposte voordat die “wit vreemdelinge” hul verskyning gemaak het. Die Namibiese evangeliste se vertroudheid met die tradisionele kultuur en die plaaslike volkstaal het hulle ’n geloofwaardigheid gegee wat baie van die Europese nuwelinge moeilik gevind het om te verkry. Deur sending en kerkgeskiedenis tussen 1820 en 1990 met ’n biografiese benadering te verweef, bring die skrywer ’n versteekte hoofstuk in die Namibiese geskiedenis na vore. As sodanig word lig gewerp op die geskiedenisse van baie Namibiese gesinne, veral dié wat aan die RSG en Evangelies-Lutherse Kerk in Namibië (ELCRN) verbind is.Hans-Martin Milk is gebore in Suider-Afrika en het in Namibië grootgeword en hier gewoon totdat hy in die 1970’s in ballingskap die land verlaat het. Hy het ná onafhanklikwording na Namibië teruggekeer om in die Kavango-omgewing skool te gee. In hierdie tyd het hy met sy historiese navorsing oor die RSG en die Kavango begin.By die geleentheid vanaand sal die skrywer en die historici en argivarisse Wolfram Hartmann en Werner Hillebrecht die boek en ELCRN se sending- en kerkargiefprojek bekend stel.Die bekendstellingsgeleentheid word om 18:00 by die ELCRN se Friedenskirche in Windhoek gehou. Kontak 081 610 0691 vir navrae.

Delf in die argiewe van Namibiese godsdiens

Kommentaar

Republikein 2025-11-04

Meld asseblief aan om kommentaar te lewer

Delf in die argiewe van Namibiese godsdiens

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.