Wêreldberoemde trio in Windhoek

Die FNB Windhoek Woordfees begin vanjaar op ’n hoë noot met die wêreldbekende Charl du Plessis Trio, wat saam met die Namibiese Ensemble onder leiding van Jürgen Kriess feesgangers vanaand by die DHPS Aula in Windhoek met Bach & Beatles gaan vermaak.

Die trio, wat in 2006 gestig is en bestaan ​​uit pianis Charl du Plessis, baskitaarspeler Werner Spies en tromspeler Peter Auret, het reeds nege albums en twee DVD’s opgeneem.

Die groep het ook ’n opnamekontrak met die Switserse platemaatskappy, Claves, en het reeds SAMA-toekennings, ’n Ghoema-toekenning en ’n Fiëste-toekenning ingepalm. Hulle toer ook gereeld in Asië, Europa en Suider-Afrika.

Sanet Prinsloo, ’n lid van die Woordfees se komitee, meen dit is veral belangrik vir jong kinders wat in musiek belangstel om hierdie geleentheid by te woon.

“Dis so belangrik vir my dat die kinders kan sien wat kan gebeur en wat moontlik is. 

“Ek het gister vir iemand gesê, as jy ’n kind het wat vanjaar musiekskool toe gaan, dan moet jy hierdie kinders na die konsert bring,” sê sy.

Prinsloo het ook uitgebrei oor die nuwe lede van die Windhoek Woordfees-komitee en hul voorneme om vanjaar hoëgehalte plaaslike produksies op hul verhoë te plaas.

“Jy weet hoeveel talent ons in hierdie land het, ons wil hulle vanjaar bevorder,” sê sy.

Kaartjies vir Bach & Beatles is beskikbaar by www.eticket.my.na.
– [email protected]