Staking begin vandag by Cheetah-sementfabriek

Namibië se tweede sementfabriek naby Otjiwarongo sal vandag nog arbeidsonrus moet trotseer nadat die Nasionale Mynwerkersunie (MUN) Vrydag aangekondig het dat sy lede vanaf vanoggend voor die hekke sal betoog.

Mnr. Brian Tjihero, MUN se noordelike streekorganiseerder, het Whale Rock Cement wat die Cheetah Cement-aanleg besit, amptelik ingelig dat die protesoptrede vandag om 07:30 by dié aanleg sal afskop.

Intussen het Whale Rock Cement Sondag in ’n nuusvrystelling by monde van sy hoofbestuurder, mnr. Kevin Lee, gepleit dat die vakbond en sy werkersverteenwoordigers na rede moet luister.

“Hierdie onrealistiese eise en dreigemente van nywerheidsoptrede is teenproduktief en kan tot ongewenste werksverliese lei,” skryf hy.

Lee erken dat die aanleg sedert sy begin vroeg in 2018 nog nie ses maande agtereenvolgend operasioneel was nie.

Onlangs is werksaamhede weer eens gestop nadat die ministerie van arbeid, nywerheidsbetrekkinge en werkskepping daarop aangedring het dat die veiligheid van werknemers aandag moet geniet. Die aanleg het tussen 10 Mei en 23 Mei gesluit om dié kwessies te takel.

Volgens Lee het die Covid-19-pandemie en die gepaardgaande inperkings die maatskappy se bedrywighede beïnvloed, maar geen geld is van werknemers se salarisse tydens dié periode afgetrek nie.

“As ’n maatreël om te verseker dat werknemers genoeg het om van te lewe, het Whale Rock Cement verlofdae benut, en selfs so ver gegaan om werknemers hul volle vergoeding te betaal, selfs al het hulle nie genoeg verlofdae gehad om die inperkingstydperk te dek nie.”

Die maatskappy het probeer om te verseker dat werknemers hul volle basiese salarisse tydens die pandemie kry, het hy gesê.

Lee sê werknemers het aan die einde van 2020 bonusse ontvang gelykstaande aan 50% van hul salarisse, en volle salarisbonusse aan die einde van 2021, al het die maatskappy geen wins in daardie jare getoon nie.

“Ten spyte van dié opofferings wat Whale Rock Cement gemaak het, gaan MUN en werkersverteenwoordigers voort om onrealistiese eise stel,” sê hy.

Volgens Lee bied die maatskappy ’n verhoging van N$800 vir werknemers wat maandeliks minder as N$6 000 verdien, en N$500 meer vir diegene wat meer as N$6 000 verdien.

Cheetah Cement bied verder 80%-bydrae tot mediesefondslidmaatskap, behuisingstoelaag van N$500 en N$30 se etetoelaag per werkende dag, asook om nagskoftoelaes vanaf 10% na 15% oor die volgende twee jaar te verhoog.

Hy sê die vakbond eis ’n 9%-salarisverhoging vir al die werknemers, 15%-pensioenfondsbydrae, 100%-mediesefondsbydrae vir werknemer en twee afhanklikes, N$2 500 meer vir behuising, en dat verhogings tot April 2020 teruggedateer word. Verder eis die vakbond dat werknemers vergoed moet word soos soortgelyke poste by Namibië se ander sementaanleg.

Volgens Tjihero verdien meeste werknemers van Cheetah Cement tussen N$3 600 en N$4 600 per maand, terwyl werkers by Ohorongo Cement drie tot vier keer meer verdien.

“Dit maak nie sin in mynbou nie. Ons het ’n graderingstelsel voorgestel, maar hulle het nooit daarop gereageer nie. Verbeel jou, iemand verdien meer as sy toesighouer. Dit maak nie sin nie,” brei hy uit.

Tjihero sê daar is werknemers wat N$100 se behuisingstoelaag verdien, en dat die aanbod van N$500 eers onlangs gemaak is.

Intussen is dit sowat drie en ’n halwe jaar sedert die vorige verhoging, en nadat onderhandeling in 2020 begin het. Die vorige verhoging was voor MUN as onderhandelaars aangestel is en is ook selektief toegepas, volgens hom.

“Ja-ja, die staking gaan voort,” het hy gister oor vanoggend se protesoptrede gesê.

– [email protected]