Sementfabriek se deure vir eers gesluit

Die Chinese sementfabriek buite Otjiwarongo wat die afgelope tyd verskeie kere oor arbeidskwessies in die nuus was, is deur die ministerie van arbeid, nywerheidsbetrekkinge en werkskepping gesluit. Arbeidsinspekteurs wat deur polisiebeamptes van Otjiwarongo vergesel is, het die Cheetah Cement-aanleg Dinsdag gesluit. Luidens ‘n brief van die ministerie volg dié sluiting op kommerwekkende veiligheids- en gesondheidskwessies wat tydens inspeksies by Cheetah Cement – spesifiek by die slypstasie, sementmeule, sementpakhuis en sementwerkswinkel – op 3 Mei verlede jaar en 27 April vanjaar opgemerk is. Nog ’n bydraende faktor was beroepsbeserings wat opgedoen is toe ‘n werknemer op 4 Maart vanjaar sy regter-ringvinger verloor het en ‘n ander werknemer op 27 April ’n vingerbesering opgedoen het terwyl hy die stofverwyderaar skoongemaak het.Die fabriek sal gesluit bly totdat alle geïdentifiseerde gevare en veiligheidskwessies uit die weg geruim is, en veilige werksplekprosedures en veiligheidsmaatreëls waarmee die inspekteur van beroepsgesondheid en -veiligheid tevrede is, geïmplementeer is.VERKLARING VAN MINISTERIEDie arbeidsministerie het laat gistermiddag ’n verklaring uitgereik waarin die redes vir die tydelike sluiting aangedui word. Volgens die verklaring is werkers nie met die nodige persoonlike beskermende toerusting (PPE’s) soos onder meer gehoorbeskerming vir graafmasjienoperateurs, gordels vir rugsteun en gesigmaskers wat ontwerp is vir mynbedrywighede met oormatige stof, toegerus nie. Die werkgewer se versuim om goeie huishouding op die perseel en binne die sementmeule en -stoor te handhaaf, asook om voldoende sanitêre geriewe, ’n eetsaal vir werknemers en om noodhulp en noodreëlings te verskaf, is as redes aangevoer.Die bestuur het ook nie ’n statutêre struktuur vir veiligheid op die terrein geimplementeer nie aangesien geen gesondheids- en veiligheidskomitee aangestel is nie.Die maatskappy het nog nooit die gevare en risiko’s verbonde aan die fabriek se werksaamhede ondersoek en geïdentifiseer nie en maatreëls om risiko te voorkom of te verminder, is nie toegepas nie. Geen gesondheids- en veiligheidsbeleid en -program is in plek om werknemers van die nodige inligting en opleiding te voorsien sodat hulle veilig en sonder risiko kan werk nie.Die vragmotors word bestuur sonder behoorlike gereedskap en masjinerie om bande te hanteer en die verklaring dui aan dat die maatskappy geen veilige werksprosedures vir die hantering van bande in plek het nie, luidens die verklaring. Die werkswinkels se beligting is ook onvoldoende. Intussen het ‘n menslike hulpbron-beampte by Cheetah Cement wat anoniem wou bly aan Republikein gesê hulle werk hard daaraan om die kwessies wat die ministerie uitgelig het, te takel en reg te stel. – republikein@republikein.com.na

Sementfabriek se deure vir eers gesluit

Kommentaar

Republikein 2026-10-15

Meld asseblief aan om kommentaar te lewer

Sementfabriek se deure vir eers gesluit

Kommentaar

Republikein 2026-10-15

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.