NHE-werknemers betoog landswyd

Lede van die Staatsdiensunie van Namibië (PSUN) het Maandag na die Nasionale Behuisingsonderneming (NHE) se kantore in verskeie dorpe landswyd opgeruk. Dit om hul ontevredenheid oor onregverdige behandeling by dié staatsonderneming verantwoordelik vir behuising, te opper. Republikein het vreedsame protesoptrede tydens Maandag se etensuur in Windhoek, Rundu, Walvisbaai en Oshakati waargeneem.Op Walvisbaai het werknemers buite die NHE se hek hul optog gehou, terwyl ’n handjievol lede ’n klagskrif aan die bestuurder op Rundu oorhandig het.Volgens die werknemersverteenwoordiger op Rundu, me. Monica Shipapo, wag hulle nog op die bestuur se reaksie.Mnr. Patrick Kaaheke van die Oshakati-tak het ook gesê dat hulle nog op terugvoering wag.Die meeste mense het by die NHE se tak in Eros in die hoofstad saamgekom.Dié tak se werknemersverteenwoordiger, mnr. Immo Thaniseb, het oor hul griewe uitgebrei.“Die protes is oor die 60% eenmalige uitbetaling wat die bestuur aan ons werknemers belowe het. Die ander groot kwessie is die waarnemende toelae wat volgens die ooreenkoms met die vakbond 50% van die verskil (tussen vergoeding vir die oorspronklike pos en vergoeding vir die pos waarin die werknemer waarneem) is, wat hulle intussen omgekeer het en 100% aan die uitvoerende beamptes betaal het.” Hy sê dié reëling het vir drie uitvoerende beamptes gegeld toe hulle in hoër poste waargeneem het. Thaniseb sê dat NHE-werknemers se salarisse drie jaar laas aangepas is en verlede jaar moes hulle met ’n eenmalige uitbetaling van N$2 500 klaarkom, terwyl nog geen verhoging vir vanjaar aangebied is nie.Die NHE het in die verlede gesê die kwessie van onreëlmatigheid rakend die behandeling van uitvoerende beamptes is intern bespreek, en dat werknemers die huidige finansiële situasie verstaan, wat nie enige salarisverhogings toelaat nie.Volgens die staatsonderneming was die waarnemingstoelaag wat 50% minder was net tydelik en is intussen weer reggestel. Die vakbond het ook voorheen gesê daar is oor die 60% eenmalige uitbetaling ooreengekom maar dit het nooit gerealiseer nie. Verder het die vakbond oor die NHE se finansiële boekhouding uitgebrei en gesê die onderneming se boeke is laas in 2016 voorberei. Sedert 2017 is geen geouditeerde finansiële jaarverslae vrygestel nie, wat die swak prestasie van die bestuur uitbeeld, luidens die vakbond. PSUN sê die NHE moes elke jaar 1 250 huise bou maar kon slegs 600 huise sedert 2016 aan die Namibiese mark voorsien. Die vakbond dring aan dat die regering moet ingryp voor dié staatsonderneming dieselfde pad as Air Namibia stap. Die nasionale lugredery is in 2021 gelikwideer. – augetto@republikein.com.na

NHE-werknemers betoog landswyd

Kommentaar

Republikein 2025-08-04

Meld asseblief aan om kommentaar te lewer

NHE-werknemers betoog landswyd

Kommentaar

Republikein 2025-08-04

Meld asseblief aan om kommentaar te lewer

MELD AAN

Advertensie