Meer druk op jou brein in oopplankantore

Ondanks so baie fokus daarop om werkers ná die Covid-19-pandemie terug in kantore te kry, was daar baie minder fokus op die impak daarvan om terug te keer na oopplan-werksruimtes.

Meer navorsing bevestig nou wat baie vermoed het: Jou brein moet harder werk in oopplanruimtes as in private kantore.

In ’n onlangs gepubliseerde studie het navorsers by ’n Spaanse universiteit 26 mense tussen hul middel 20's en middel 60's met draadlose elektro-enkefalogram (EEG)-kopstukke toegerus. EEG-toetsing kan meet hoe hard die brein werk deur elektriese aktiwiteit deur sensors op die kopvel te monitor.

Deelnemers het gesimuleerde kantoortake verrig, soos om kennisgewings te monitor. e-pos-boodskappe te lees en te beantwoord, en lyste woorde te memoriseer en weer te gee.

Elke deelnemer is gemonitor terwyl die take in twee verskillende omgewings gedoen is: ’n oopplan-werksruimte met kollegas naby en ’n klein, afgesonderde kantoor met deursigtige, geglasuurde panele aan die een kant.

Die navorsers het op die frontale streke van die brein gefokus wat vir aandag. konsentrasie en die uitfiltreer van afleidings verantwoordelik is. Hulle het verskillende soorte breingolwe gemeet.

BREINGOLWE

Volgens Susan Hillier, ’n neurowetenskaplike, openbaar verskillende breingolwe afsonderlike psigiese stadiums:

- "Gamma" word gekoppel aan toestande of take wat meer gefokusde aandag vereis:

- "Beta" word met hoër angstigheid en meer aktiewe toestande verbind, met aandag wat dikwels ekstern gerig is:

- "Alfa" word gekoppel aan ’n baie ontspanne toestand, en passiewe aandag (soos om stil te luister, maar nie deel te neem nie);

- "Teta" word verbind met diep ontspanning en inwaartse fokus; en

- "Delta" word aan diep slaap gekoppel.

In die Spaanse studie is bevind dat dieselfde take wat in die afgesonderde kantoor teenoor die oopplan-werksruimte gedoen is, volledig teenoorgestelde patrone tot gevolg gehad het.

Dit verg moeite om afleidings uit te skakel.

Die studie het getoon dat beta-golwe, wat met aktiewe psigiese prosessering vereenselwig word, in die afgesonderde kantoor aansienlik afgeneem het, net soos in die geval van alfa-golwe wat met passiewe aandag en algehele aktiwiteit in die frontale streke van die brein verbind word.

Dit beteken mense se breine het toenemend minder moeite ervaar om met dieselfde werk vol te hou.

Die oopplankantoor se uitkomste was die teenoorgestelde.

Gamma-golwe, wat met ingewikkelde psigiese prosessering verbind word, het voortdurend geklim. Teta-golwe, wat sowel werkgeheue as verstandelike uitputting naspoor, het toegeneem.

Twee kernmaatstawwe het betekenisvol gestyg: Opwekking (hoe waaksaam en geaktiveer die brein is) en betrokkenheid (hoe baie psigiese inspanning aangewend word).

Met ander woorde, in die oopplankantoor moes deelnemers se brein harder werk om prestasie vol te hou.

Selfs wanneer ons probeer om afleidings te ignoreer, moet ons breine hard werk om dit uit te filtreer.

In teenstelling hiermee het die afgesonderde kantoor die meeste agtergrondgeraas en visuele ontwrigting uitgeskakel, wat die deelnemers se brein in staat gestel het om meer doeltreffend te werk.

Navorsers het ook meer veranderlikheid in die oopplankantoor aangetref. Party mense se breinaktiwiteit het drasties toegeneem, terwyl ander matige veranderinge getoon het. Dit dui op individuele verskille in hoe steurend ons oopplankantore vind.

Met slegs 26 deelnemers was dit ’n relatief klein ondersoek. Maar die bevindinge strook met belangrike navorsing in die afgelope dekade.

VORIGE NAVORSING

In ons 2021-ondersoek het ek en my kollegas ’n betekenisvolle oorsaaklike verhouding tussen geraas in oopplankantore en psigologiese stres gevind. Ons het 43 deelnemers in beheerde toestande bestudeer deur harttempo, vel-geleidingsvermoë en gesig-emosie-herkenning met behulp van kunsmatige intelligensie te gebruik.

Ons het bevind dat die negatiewe atmosfeer in kantore met 25% toegeneem het en psigologiese stres met 34%.

’n Ander studie het daarop gedui dat agtergrondgesprekke en lawaaierige omgewings kognitiewe prestasie kan verlaag en afleidings vir werkers laat toeneem.

En in ’n 2013-ontleding van meer as 42 000 kantoorwerkers in Amerika, Finland, Kanada en Australië is bevind dat diegene in oopplankantore minder tevrede met hul werksomgewing is as dié in private kantore. Dit was grootliks weens toenemende. onbeheerde geraas en ’n gebrek aan privaatheid.

Net soos ons nou erken dat swak ontwerpte stoele fisieke spanning kan veroorsaak, wys jare van navorsing hoe die ontwerp van die werksruimte tot kognitiewe spanning aanleiding kan gee.

WAARDE VAN ONONDERBROKE WERK

Die vermoë om sonder onderbreking en afleiding te fokus en te konsentreer is ’n fundamentele vereiste vir moderne kenniswerk. Tog word die waarde van ononderbroke werk voortdurend in die ontwerp van werkplekke onderskat. Dit is noodsaaklik om sones te skep waar werkers hul werksomgewing by die taak kan aanpas.

LinkedIn het sy vlagskip-kantoor in San Francisco herontwerp in reaksie op meer personeel wat ná die pandemie hibriede werk doen. LinkedIn het sy werkstasies in oopplangebiede gehalveer en in die plek daarvan met 75 soorte werksomgewings geëksperimenteer, insluitend werksomgewings vir stil fokus.

PRAKTIESE MAATREëLS

Organisasies wat oor hul werkers se brein besorg is, moet ’n paar praktiese maatreëls oorweeg. Dit sluit in verskillende werksones en klankdemptegnologieë, asook oordeelkundig geplaaste afskortings om visuele en ouditiewe afleidings te verminder.

Hoewel hierdie ekstra toevoegings tot oopplankantore aanvanklik meer sal kos, kan dit die moeite werd wees. Navorsing het die betekenisvolle verskuilde tol van swak kantoorontwerp op produktiwiteit, gesondheid en werknemerretensie uitgewys.

Om aan werkers ’n groter keuse te gee oor hoeveel hulle aan lawaai en ander onderbrekings blootgestel is, is nie ’n luukse nie. Om meer gedoen te kry, met minder spanning op ons brein, moet beter ontwerp by die werk as ’n noodsaaklikheid gesien word.

– The Conversation

* Sander is MBA-direkteur en medeprofessor van organisatoriese gedrag by die Bond-Sakeskool by die Bond-Universiteit in Queensland, Australië.