Furnmart-werkers verwerp loonverhoging van 5%

Eliot Ipinge en Loise Shiimi

Werknemers by Furnmart-winkels het gister ’n landswye staking oor loongeskille van stapel gestuur, nadat hulle die maatskappy se aanbod van ’n salarisverhoging van 5% verwerp het.

Die werkers, wat deur die Metaal- en Verwante Werkersunie van Namibië (Manwu) verteenwoordig word, sê die nywerheidsaksie sal voortduur totdat hul eise van ’n salarisverhoging van 8%, asook behuisings- en vervoertoelae nagekom word.

By ’n betoging op Rundu het Manwu se noordelike streekkoördineerder, Musohwa Matengu, gesê werknemers het gister amptelik met die staking begin nadat onderhandelinge met die maatskappy nie ’n ooreenkoms opgelewer het nie.

“Ons eis eenvoudig dat Furnmart vir ons ’n salarisverhoging van 8% toestaan, saam met ’n behuisingstoelae van N$500, maar die maatskappy doen dit nie,” het hy gesê.

Volgens Matengu het die maatskappy aan werkers ’n salarisverhoging van 5% aangebied, wat werknemers as onvoldoende verwerp het te midde van die stygende lewenskoste.

“Dinge het verander. Die prys van brood is hoog, brandstofpryse het gestyg en vervoerkoste het landswyd toegeneem, maar salarisse het dieselfde gebly,” het hy gesê.

Matengu het bygevoeg dat baie werknemers ver van hul werkplekke woon, omdat hulle nie verblyf nader aan hul winkels kan bekostig nie, wat dikwels tot lang pendelritte en laat kom lei.

“Ten minste as ons hierdie behuisingstoelae van N$500 ontvang, sal ons ordentlike verblyf nader aan ons werkplekke kan kry en ons lewensomstandighede verbeter,” het hy gesê.

By die staking op Ondangwa het werknemers aan Network Media Hub (NMH) gesê dat hoewel hulle in 2019 ’n salarisaanpassing ontvang het, hul versoeke vir bykomende voordele onbeantwoord gebly het.

Volgens die werknemers het hulle vroeër vanjaar ’n voorstel ingedien waarin ’n salarisverhoging van 8% versoek is. Die maatskappy het egter na bewering met ’n aanbod van 5% gereageer, wat werkers verwerp het.

Die werknemers hou vol dat hulle nie na die werk sal terugkeer voordat ’n ooreenkoms bereik is oor ’n salarisverhoging van 8%, saam met verbeterde behuisings- en vervoertoelaes nie.

In gesprek met NMH tydens die staking het Gisela Teofelus, wat in 2021 by die maatskappy aangesluit het, gesê lae lone het baie werkers gedwing om op krediet staat te maak om basiese noodsaaklikhede te kan bekostig.

“Ons wil die dinge wat ons nodig het met kontant koop in plaas daarvan om voortdurend van krediet afhanklik te wees, omdat ons dit nie kan bekostig nie. Sedert ek by die maatskappy aangesluit het, het ek nog nooit ’n bevredigende salaris ontvang nie,” het sy gesê.

’n Ander werknemer, Asia Aakunda, wat sedert 2007 vir Furnmart werk, het frustrasie uitgespreek dat sy, ondanks haar jare se diens, dieselfde salaris verdien as nuwe werknemers.

Sy het beklemtoon dat die staking nie bedoel is om die maatskappy te ondermyn nie, maar eerder om billike vergoeding en verbeterde werksomstandighede te verseker.

“Ons waardeer en ag die maatskappy, veral die kommissie wat ons verdien wanneer klante aankope doen. 

“Tog sal beter salarisse en voordele die algehele werksomgewing verbeter en help om werknemers te lok en te behou,” het sy gesê.

Aakunda het herhaal dat die staking sal voortduur totdat werkers ’n salarisverhoging van 8% ontvang, saam met verbeterde behuisings- en vervoertoelae.

Toe sy vir kommentaar gekontak is, het Furnmart se administrateur in die menslikehulpbronne-afdeling, Mara Trins, geweier om kommentaar te lewer en gesê die maatskappy kan geen inligting verskaf wat met die staking verband hou nie.

– [email protected]