Veldbrande verwoes tienduisende hektaar

Die veldbrande in die gebiede van Omaruru en Kalkfeld is volgens die Omaruru Boerevereniging (BV) veroorsaak deur droë storms, nalatigheid en regulatoriese oortredings in die houtskoolbedryf. Die Omaruru BV het ’n nasionale beroep op brandvoorkoming uitgereik nadat veldbrande die afgelope weke tienduisende hektaar weiding vernietig het.In ’n verklaring gedateer 30 September het die vereniging se komitee gesê boere is reeds onder erge druk weens die uitbreking van bek-en-klouseer en ’n verwagte droogte.“Ons het in die afgelope weke die verstommende manier gesien waarop kommersiële en ontluikende boere, dorpsinwoners en kommunale gebiede saam kan werk om brande te bestry, maar ons mors te veel energie en geld op voorkombare rampe,” lui die verklaring.Die vereniging het die publiek gevra om mense te keer om vure langs paaie aan te steek of om warm kole of masjinerie onverskillig te hanteer, en om nie-nakomende houtskoolverbranding by die owerhede aan te meld. Boere is gevra om personeel in brandveiligheid op te lei, plaaspaaie skoon te maak, water byderhand te hou en werkers met vuurkloppers toe te rus.NASA-satellietkaarte wat by die verklaring aangeheg is, toon brandwaarnemings rondom Omaruru in Augustus en weer in September.In September het die direktoraat van bosbou in die ministerie van die omgewing, bosbou en toerisme ’n houtskoolprodusent in die distrik met N$8 000 beboet nadat daar by brandplekke op die plaas geen brandstroke en geen brandbestrydingstoerusting gevind is nie. Die ministerie het gesê die boete was vir die versuim om aan permitvoorwaardes te voldoen, nie vir die veroorsaking van die brand nie en geen strafsaak geopen is nie.Die Erongo-streekraad het om verduideliking gevra oor ’n vroeëre berig van Erongo oor sy noodvergadering van die ramprisiko-bestuurskomitee op 27 Augustus. Die versoek dek die afgebrande gebied, die oorsake, die rol van die polisie en bosbou, die aksieplan en die rampfonds. Dit het die hoofstreekbeampte se aanbieding en die notule van die vergadering voorsien.In sy aanbieding, getiteld “status van veldbrande in Karibib-, Omaruru- en Daures-kiesafdelings”, het die hoofstreekbeampte, Mupenzeni Ntelamo, gesê amptelike syfers is nog hangende. Hy het geraam dat meer as 27 000 hektaar geraak is, veral rondom !Kawab, Uikrens en Klassenkamp. By die regstreeks uitgesaaide vergadering het hy gesê byna 100 000 hektaar is verlore. Daardie syfer verskyn nie in die aanbieding of die notule nie.Ntelamo het een brand as “’n daad van God” beskryf en gesê “die res is, dink ek, die daad van mense”. Sy aanbieding het weerlig onder die moontlike oorsake gelys en gesê voorlopige waarnemings dui daarop dat baie van die brande deur mense veroorsaak is. Die notule teken aan sommige vermoedelike oorsake is nog nie geverifieer nie en dat ondersoeke nodig is.By die vergadering het Ntelamo gesê die ministerie, bousboudirektoraat en die Namibiese polisie “het geen aksie vir ons geneem nie”. Die notule teken die voorsitter se kommer aan oor die gebrek aan arrestasies of vervolgings oor brande wat vermoedelik doelbewus gestig is. Dit lys ondersoeke deur die polisie en bosbou na vermoedelike oorsake en moontlike brandstigting onder die vergadering se onmiddellike prioriteite.AKSIEPLANDie konsep-aksieplan is by die vergadering onder ’n algemene opskrif voorgelê. ’n Geskrewe weergawe dra die opskrif “Aksieplan – veldbrande Daures- en Karibib-kiesafdeling”. Die raad het gesê Omaruru was nie bedoel om uitgesluit te word nie en dat die plan bedoel is om die hele streek te dek. Lede het die uitbreiding daarvan ondersteun na ’n omvattende brandbestuurstrategie vir die streek wat ook brande in stedelike en informele nedersettings dek. Die plan is nie op 27 Augustus aanvaar nie, hangende insette van die direktoraat van bosbou.Die rampfonds het ten tyde van die vergadering ’n gerapporteerde balans van ongeveer N$264 000 gehad. Sommige instellings wat veronderstel was om by te dra, het nie betaal nie en die komitee het die finansiële afdeling gevra om die bedrae wat verskuldig, ontvang en uitstaande is, te versoen. Die notule dui aan die syfers nog moet deur die ministerie van finansies bevestig word.– adam@erongo.com.na

Veldbrande verwoes tienduisende hektaar

Kommentaar

Republikein 2026-10-05

Meld asseblief aan om kommentaar te lewer

Veldbrande verwoes tienduisende hektaar

Kommentaar

Republikein 2026-10-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.