Gemeenskapstuin help met wanvoeding

Wanvoeding het aansienlik in die Otjombinde-kiesafdeling in Omaheke afgeneem, namate ’n produksieprojek in die gemeenskap begin het om kos aan plaaslike huishoudings te verskaf, sê kiesafdelingsraadslid Wenzel Kavaka.Hy het vandeesweek in ’n onderhoud met Republikein in die streek gesê die projek het verder as grondvoorbereiding beweeg en produseer nou voedsel. Dit skep ook werk vir jongmense. “Ons begin kos vir die gemeenskap produseer, want selfs ons wanvoeding het aansienlik binne die kiesafdeling afgeneem.”Volgens Kavaka het die tuin tans 98 jongmense in diens, wat by die produksie van voedsel vir die gemeenskap betrokke is. Dit is in vergelyking met 81 jongmense wat aanvanklik gewerf is om die terrein skoon te maak en te omhein toe dit van stapel gestuur is.Kavake se opmerkings volg teen die agtergrond van Omaheke se voortgesette stryd met wanvoeding onder kinders. Die Namibië SMART-voedingsopname van 2024 wat deur die ministerie van gesondheid en maatskaplike dienste met die ondersteuning van die Verenigde Nasies se Kinderfonds (Unicef) en ontwikkelingsvennote uitgevoer is, is bevind 34,8% van kinders onder vyf jaar in Omaheke lei aan vertraagde groei. Dit is gesamentlik naas Otjozondjupa die hoogste voorkoms in die land. Omusati het 33,3% aangeteken, gevolg deur Hardap (32,8%), ||Kharas (31,4%) en Oshikoto (30,3%), wat almal bo die nasionale gemiddelde van 24% is. Die opname het ook bevind dat 16,9% van kinders in Omaheke ondergewig is.Unicef het vroeër wanvoeding onder kinders in Namibië toegeskryf aan ’n kombinasie van armoede, voedselonsekerheid, swak verskeidenheid in hul dieet, voortdurende droogtes, siektes, onvoldoende sanitasie en beperkte toegang tot gesondheidsorg. Dit is veral van toepassing in afgeleë landelike gemeenskappe.Die gemeenskapstuin van 13 hektaar by Tallismanus is danksy ’n vennootskap tussen die kantoor van die eerste minister (OPM) en die Omaheke-streekraad gevestig. Die doel is om voedselsekerheid te verbeter, werk te skep en wanvoeding te help bekamp. Die regering het sowat N$3,8 miljoen in die loodsprojek belê, wat heinings, infrastruktuur vir besproeiing, plaastoerusting en twee boorgate insluit om produksie te ondersteun.Die eerste minister, Elijah Ngurare, het die inisiatief vroeër as ’n loodsprojek beskryf wat die regering hoop om in Namibië se 121 kiesafdelings te herhaal. Volgens Ngurare kan gemeenskapstuine voedselsekerheid versterk, werk skep en voeding in huishoudings verbeter.Terwyl Kavaka die projek erkenning gegee het vir die afname in wanvoeding, het hy nie syfers verskaf van die hoeveelheid gevalle wat dit aandui nie. Hy het ook nie die tydperk aangedui waartydens die afname aangeteken is nie. Buiten vir die gemeenskapstuin het Kavaka gesê die kiesafdeling het sowat 70 jongmense in diens geneem om plantegroei langs die grensheining tussen Namibië en Botswana skoon te maak. Dit help om instandhoudingswerk midde kommer oor die verspreiding van bek-en-klouseer in die buurland Botswana te verminder as deel van voorkomende maatreëls.ALKOHOLMISBRUIKKavaka het alkoholmisbruik as een van Otjombinde se grootste maatskaplike uitdagings geïdentifiseer. Volgens hom raak ongelisensieerde afsetpunte wat tuisgemaakte alkohol verkoop steeds gemeenskappe.“As ek die mag het om enigiets te verander, moet daardie ongelisensieerde plekke óf ’n lisensie kry óf hulle moet gesluit word,” het hy gesê.Kavaka het gesê die verbetering van padinfrastruktuur en die uitbreiding van telekommunikasiedekking steeds sleutelprioriteite is. Hy beraam dat slegs sowat 60% van die kiesafdeling tans betroubare kommunikasiedekking het. – phillipus@nmh-hub.com.na

Gemeenskapstuin help met wanvoeding

Kommentaar

Republikein 2026-08-06

Meld asseblief aan om kommentaar te lewer

Gemeenskapstuin help met wanvoeding

Kommentaar

Republikein 2026-08-06

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.