'Wie anders moet ek blameer?'

Die pyn in haar stem sny deur elke woord wat sy uiter. Dolly Maasdorp, ouma van die wyle Ingrid Maasdorp, kan steeds nie vrede vind maande ná die tragedie wat die lewe van haar vyfjarige kleindogter geëis het nie.Ingrid, 'n Graad 0-leerling aan die K.W. Von Marees Laerskool, is op 20 Maart 2025 as vermis aangemeld nadat sy by die skool afgelaai is. Haar liggaam is die volgende dag in 'n tonnel naby die nuwe brug langs die A1-pad in Veddersdal ontdek, 'n grusame ontdekking wat die familie en gemeenskap verpletter het.Maasdorp het die vraag gevra wat haar sedert daardie dag geteister het: "Wie anders moet ek blameer? My kind was by die skool. Sy is deur 'n sekere dame van die skoolterrein geneem," het sy gesê, terwyl sy onthou het wat getuies aan haar gesê het.Volgens Maasdorp het 'n klasmaat van Ingrid bevestig dat "'n lang dame met 'n ligte vel 'n kopdoek op haar kop" daardie oggend tussen sewe en agt met die meisietjie weggestap het. Toe die seun in haar klas gevra is of die dame Ingrid altyd opgetel het, het hy gesê ’dis net die oupa wat haar sal optel’, wat waar is", het die ouma verduidelik.Vir Maasdorp is die skool se beweerde nalatigheid die kern van haar pyn: "As die onderwyser betyds daar was, sou dit nie gebeur het nie. As daar 'n geregistreerde sekuriteitsmaatskappy was, sou dit nie gebeur het nie," het sy gesê. "Eers ná die voorval is die sekuriteitsmaatskappy gehuur."Sy dring daarop aan dat behoorlike sekuriteit die ontvoering kon voorkom het. "As die sekuriteitsmaatskappy geregistreer was, sou hy of sy opgemerk het dat hierdie kind altyd deur slegs een persoon opgetel word. So hoekom sou 'n ander persoon haar optel en in 'n ander rigting loop?" het sy gevra, haar stem bewerig.Die bedroefde ouma het die skool ook daarvan beskuldig dat hulle nie met die familie gekommunikeer het op die dag toe Ingrid verdwyn het nie. “Die skool het probeer slim speel deur te sê dat hulle wel gekommunikeer en briewe gestuur het dat daar nie die volgende dag skool sou wees nie,” het sy gesê. “Maar hulle het eers die volgende dag erken dat die Graad 0's geen briewe ontvang het nie.”FRUSTRASIEHaar frustrasie verdiep soos sy die besonderhede onthou. “As hulle aanhou sê dat die Graad 0's briewe van die skool ontvang het, hoekom was daar ander Graad 0-leerders by die skool?” het sy gevra. “As ons haar kosblik en skooltas voorberei het, sou ons 'n brief gesien het. Sy was spraaksaam en sou ons altyd vertel wat die onderwyser gesê het.”Toe sy gevra is of die skool of die skoolraad haar ooit ná die tragedie gekontak het, was Maasdorp se antwoord 'n ferm nee. “Nie eens die skoolraad het met my gekommunikeer nie,” het sy gesê.Maasdorp het gesê sy het op 7 Augustus vanjaar 'n brief aan die skool oor haar bekommernisse geskryf en 'n antwoord en 'n erkenning van ontvang versoek. Die erkenning van ontvangs van die brief het volgens die ouma 'n bietjie lank geneem, maar is uiteindelik deur die waarnemende skoolhoof onderteken. Vier dae later is sy op 11 Augustus meegedeel dat sy 'n formele antwoord sou ontvang.“Ek het hulle sewe dae gegee om te antwoord,” het sy gesê. “Hulle het vir my gesê sewe dae is te min, aangesien hulle nog met die onderwysdirekteur van die Otjozondjupastreek moet kommunikeer. Maar tot nou toe nog geen antwoord nie en dit is nou die tweede maand.”ONDERSOEK SLOERDie bedroefde ouma het bevestig dat sy sedertdien regshulp ingewin het. “Ek het 'n prokureur gaan sien. Daar is 'n paar dokumente en eers dan sal die prokureur dit by die skool indien,” het sy aan Network Media Hub (NMH) gesê.Toe sy gevra is of die ondersoekbeamptes van die Namibiese polisie terugvoering aan haar voorsien het, het sy gesê: “Nee, ek lees net daarvan in die koerant. Wanneer ek bel, sê hulle net vir my daar is geen nuwe leidrade nie. Hulle sê hulle werk steeds aan die saak.”Sy het bygevoeg dat sy gelees het daar is nege getuieverklarings aan Ingrid se dossier geheg en ondersoekbeamptes wag vir DNS-uitslae van vier mense van belang, inligting wat sy net uit die media verkry het.“Dis al wat ons in die koerante gelees het,” het sy gesê. “Ons hoor net van opdaterings [van ondersoekbeamptes] wanneer óns bel.” Intussen het Network Media Hub ook bevestig dat die ma van wyle Roswinds Fabianu (6) nie regstappe teen dieselfde skool oorweeg nie.Vir Maasdorp voel geregtigheid pynlik ver weg. Tog bly haar pleidooi duidelik dat sy aanspreeklikheid wil hê, en bowenal wil sy antwoorde hê. “Wie anders moet ek blameer?” het sy stil herhaal. “My kind was in die skool.”Die tragiese opeenvolgende moorde op die voormalige "Tuindorp" op Ingrid, Roswinds Fabianu en die tiener Beyoncé Kharuxas (15) het die nasie geskok en 'n vlaag van kommer veroorsaak.- aurelia@nmh-hub.com.na

'Wie anders moet ek blameer?'

Kommentaar

Republikein 2025-10-22

Meld asseblief aan om kommentaar te lewer

'Wie anders moet ek blameer?'

Kommentaar

Republikein 2025-10-22

Meld asseblief aan om kommentaar te lewer

MELD AAN

Advertensie