Stiefseun pleit onskuldig op mesmoord

’n Man van Keetmanshoop het Maandag in die hoërhof in Windhoek onskuldig gepleit op ’n aanklag van moord en aan die hof gesê hy het uit selfverdediging opgetree toe hy sy stiefpa noodlottig met ’n mes gesteek het.

Kevin Cloete (34) word daarvan beskuldig dat hy sy 51-jarige stiefpa, Deon Bobeje, in die bors gesteek het tydens ’n gewelddadige geveg by hul huis op Keetmanshoop in Februarie 2021.

Cloete, wat tans op borgtog van N$2 000 vrygelaat is, het aan hoërhofregter Philanda Christiaan gesê dat hy Bobeje een keer met ’n mes gesteek het. Hy beweer egter dat hy dit uit selfverdediging gedoen het tydens ’n fisiese bakleiery en sonder die bedoeling om hom dood te maak.

Tydens sy getuienis het Lee-Roy Engelbrecht, ’n buurman van Cloete en Bobeje, getuig dat hy ook amper raakgesteek is terwyl hy probeer het om die geveg op te breek.

“Ek was op pad huis toe van die winkelsentrum af met kruideniersakke toe ’n buurman my gebel het om te help om die geveg tussen die twee op te breek,” het hy aan die hof gesê.

“Ek het vinnig oorgehardloop en kon daarin slaag om hulle te kalmeer, maar dit het net sowat drie minute geduur voordat hulle mekaar [weer] begin beledig het. Dit het van daar af afdraand gegaan,” het Engelbrecht bygevoeg.



GETUIEVERKLARING

Hy het ook aan die hof gesê hy glo nie Cloete het uit selfverdediging opgetree nie, aangesien Bobeje dronk voorgekom het en nie op sy eie voete kon staan sonder om te val nie.

“Die beskuldigde het Bobeje voortdurend geskop en geslaan tydens die geveg. In ’n stadium het hy selfs die woorde ‘ek sal jou steek’ gesê.”

Engelbrecht het getuig dat Cloete hom na die voorval gevolg het toe hy na ’n nabygeleë winkel gehardloop het om hulp te soek.

Hy het gesê Cloete het berouvol voorgekom en beweer dit was nie sy bedoeling om Bobeje te steek nie.

– [email protected]