Skeepsvragterminaal by Walvisbaai-hawe wemel

Augetto GraigDie wêreld se grootste vraghouerverskepingsmaatskappy, die Mediterranean Shipping Company, beter bekend as MSC Shipping, beplan om die hawe van Walvisbaai te omskep as die hoofbestemming vir die herverskeping (transshipping) van vrag deur die deel van Afrika.Alex Reali, die uitvoerende hoof van Terminal Investment Namibia (TIN), wat op 1 November verlede jaar die bestuur van die skeepsvragterminaal by die grootste hawe in Namibië oorgeneem het, het verlede week tydens ’n hoëvlak-besoek van parlementslede van die Europese Unie gepraat.TIN is 100% in besit van Terminal Investment International, wat 70% in besit is van MSC, met Amerika se BlackRock (20%) en Singapoer se GIC (10%) as vennote.“Ons vorder en ons vorder goed,” het hy gesê oor die uitbreiding en vordering in doeltreffend wat die afgelope 11 maande by die terminaal behaal is.Volgens hom is sowat 185 000 vraghouers gedurende hierdie tydperk verskuif, 40% meer as wat voorheen moontlik was, terwyl 184 skepe gelaai en afgelaai is.Hy sê die 396 voltydse werknemers, wat in drie agtuur-skofte werk, dra by tot die vordering, en het as voorbeeld daardie dag se oggendskof aangehaal, wat ongeveer 750 houers verskuif het en sodoende die skofrekord gebreek het.TIN het 259 werknemers by Namport geërf toe hulle die terminaal oorgeneem het en is steeds besig om bykomende werkers aan te stel, met vyf wat verlede week Donderdag aangesluit het en nog vyf op Vrydag, volgens Reali.Werknemers word voortdurend verder opgelei en bevorder om hul ervaring goed toe te pas en vaardighede aan nuwe werknemers oor te dra, sê hy.Baie vakleerlingskapprogramme, betaalde internskappe en inisiatiewe vir die oordrag van vaardigheid duur voort.Net vier buitelanders werk vir TIN, insluitend Reali.Die skeepsvragterminaal van 20 hektaar trek ook voordeel uit ’n beduidende belegging ter waarde van ongeveer US$200 miljoen (N$3,46 miljard) sedert verlede jaar, insluitend US$60 miljoen vir die baggerwerk van die hawe.“Wanneer Namport die nuwe hawebeperkings publiseer, sal ons die grootste vragskepe van tot 400 m lank kan akkommodeer,” het hy gesê.Die amptelike toelaatbare diepgang vir skepe wat geakkommodeer kan word, sal ook van 15 meter tot 15,5 meter verhoog, volgens inligting wat hy gedeel het.Tans spog die skeepsvragterminaal met ’n kapasiteit vir 21 187 houers, vier skip-tot-wal-huiskrane, twee mobiele hyskrane, ses rubberwielportale (gantries), ses stapelaars en drie elektrohidrouliese hyskrane, terwyl die 764 elektriese kragpunte op die landing van die uiterste belang is vir druiwe en ander temperatuurbeheerde uitvoere, sê hy.Hyskraanproduktiwiteit het in die afgelope maande met 65% verbeter, volgens Reali.Voor die einde van vanjaar verwag TIN om vyftien bykomende terminaaltrekkers in ontvangs te neem om by die 21 wat reeds in gebruik is, aan te sluit, nog 32 sleepwaens om by die huidige 10 te voeg, nog ’n brandstofwa, 2 drie-ton vurkhysers, ses ekstra skip-tot-wal-verspreiders en ’n wye reeks onderdele en gereedskap.Teen volgende jaar word nog 17 rubberwielportale, nog 2 skip-tot-wal-krane, nog twee hoë rame vir houerhantering en selfs meer toerusting en onderdele verwag, sê hy.“Wat nog voorlê, is meer aanstellings, nuwe interne geleenthede, digitale transformasie na 100% dienste wat in ’n wolk aangebied word, die volledige opknapping van alle skip-tot-wal-krane, die voltooiing van konstruksiewerk aan ’n nuwe werkswinkel en pakhuis, en hopelik die toekomstige uitbreiding van die terminaal se landing en werf,” sê Reali.Volgens hom sal TIN se direksie volgende maand besluit oor die 250 m lange landing- en terreinuitbreiding waarvoor studies reeds van stapel gestuur is. Die oorgang na elektries aangedrewe rubberwielportale om die dieselaangedrewe masjiene te vervang, is ook op die spyskaart, sê hy.– augetto@nmh-hub.com.naKyk Reali se voorlegging hier: q.my.na/8QPZ

Skeepsvragterminaal by Walvisbaai-hawe wemel

Kommentaar

Republikein 2026-03-20

Meld asseblief aan om kommentaar te lewer

Skeepsvragterminaal by Walvisbaai-hawe wemel

Kommentaar

Republikein 2026-03-20

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.