De Klerk se uitlewering (vir nou) op ys

Die uitlewering van Marén de Klerk is vir eers op versoek van Suid-Afrikaanse owerhede laat vaar.Hoewel De Klerk se uitleweringsaansoek teruggetrek is, verseker die Namibiese aanklaer-generaal, Martha Imalwa, dat dit nie die einde van die saak is nie.De Klerk, ’n voormalige prokureur, het reeds in Januarie 2020 landuit gevlug nadat sy moontlike betrokkenheid by die Fishrot-skandaal onthul is. Hy is daarna deur die Namibiese regering gesoek in verband met aanklagte van korrupsie, bedrog, diefstal en geldwassery.Hy word daarvan beskuldig dat hy sy trustrekening gebruik het vir die verspreiding van winste wat glo uit dié beweerde onwettige bedrywighede voortspruit en verband hou met verskeie rekeninge in die Fishrot-korrupsieverhoor.Die Paarl-landdroshof het in Februarie 2022 ’n lasbrief vir sy inhegtenisneming uitgereik en hy is in Junie verlede jaar in die Paarl in hegtenis geneem. Borgtog van N$50 000 is kort daarna aan hom toegestaan en dié bedrag is onlangs aan hom terugbetaal.Ná De Klerk se inhegtenisneming het sy uitleweringsverhoor begin wat deur die Suid-Afrikaanse Nasionale Vervolgingsgesag (NPS) hanteer is. Dié saak is intussen verskeie kere uitgestel en sou verlede week in die Paarl-landdroshof hervat het.Twee Namibiese staatsaanklaers, Cliff Lutibezi en Timotheus Itula, het op versoek van die kantoor van die prokureur-generaal na Suid-Afrika gereis om die verrigtinge by te woon.TERUGGETREKDie saak is glo teruggetrek op grond van ’n hooggeregshofuitspraak wat in Suid-Afrika gelewer is wat bevind het ’n land se ministerie van justisie moet uitleweringsversoeke bring en nie die aanklaer-generaal soos in De Klerk se geval nie. Die saak is dus teruggetrek omdat die korrekte plaaslike prosedures nie gevolg is nie.Die Suid-Afrikaanse staatsaanklaer het dus die terugtrekking bewerkstellig. Volgens Imalwa is hulle egter steeds in kommunikasie met die owerhede in Suid-Afrika oor die pad vorentoe.‘ONSKULDIG’De Klerk het in die verlede in hofstukke wat in ander hofsake ingedien is, aangevoer dat hy onskuldig is.“Ek ontken ten sterkste dat ek hoegenaamd deel was van kriminele aktiwiteite en wil beklemtoon dat ek net opdragte uitgevoer het,” beweer De Klerk.Hy voer aan hy het slegs die instruksies van die voormalige prokureur-generaal en nou Fishrot-beskuldigde, Sacky Shanghala, en sy vennoot en nou medebeskuldigde, James Hatuikulipi, gevolg.“In Mei 2017 het ek as regspraktisyn van die prokureur-generaal opdrag gekry om die Swapo-verkiesingsveldtog te bestuur. Ek het geen rede gehad om die wettigheid van die instruksies te bevraagteken nie. Op grond van dié opdragte het ek geld van verskeie maatskappye ontvang, wat ek dan aan sekere individue en entiteite oorbetaal het,” lui ’n verklaring van De Klerk.Voor De Klerk verlede jaar vasgetrek en in hegtenis geneem is, het hy beweer hy het die afgelope drie jaar vir sy lewe gevrees.“Daar was aanduidings dat mense na my gesoek het en hulle was nie Suid-Afrikaanse polisiebeamptes nie, maar eerder skelm agente wat gestuur is om my óf te ontvoer óf dood te maak om te verhoed dat ek enige van die bewyse in my besit bekend maak, of in die Fishrot-saak getuig,” het hy in ’n verklaring gesê.– kristien@nmh-hub.com.na

De Klerk se uitlewering (vir nou) op ys

Kommentaar

Republikein 2025-11-03

Meld asseblief aan om kommentaar te lewer

De Klerk se uitlewering (vir nou) op ys

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.