Mededinging: Nam vorder teen slakkepas

Jo-Maré Duddy - Teen die pas waarteen Namibië sy mededingingheid verbeter, gaan dit die land ’n kwarteeu – en nie vier jaar soos beplan nie – neem om die mees mededingende ekonomie in Afrika te word.Met dié som het Graham Hopwood, uitvoerende direkteur van die Instituut vir Openbare Beleidsnavorsing (IPPR), Namibië se vertoning op die Wêreld- Ekonomiese Forum (WEF) se Global Competitiveness Index (GCI) vir 2016-’17 in perspektief geplaas. Dié indeks, wat gister vrygestel is, het ’n algehele punt van 4,02 uit ’n moontlike 7 aan Namibië toegeken. Verlede jaar was die land se punt 3,99.Namibië word nou as die 84ste mees mededingende ekonomie uit 138 lande wêreldwyd beskou. Verlede jaar het Namibië die 85ste plek uit 140 lande beklee. In Afrika suid van die Sahara is Namibië die vyfde beste land om sake in te doen.Die topvier ekonomieë in die streek het só gevaar: Mauritius (4,49 punte), Suid-Afrika (4,47), Rwanda (4,41) en Botswana (4,29). Op die GCI lê Mauritius 45ste, Suid-Afrika 47ste, Rwanda 52ste en Botswana 64ste in die wêreld.In die Vierde Nasionale Ontwikkelingsplan (NDP4) was die teiken dat Namibië teen 2017 die mees mededingende ekonomie in die Suider-Afrikaanse Ontwikkelingsgemeenskap (SADC) moes wees. Dit is in April vanjaar met die Harambee-welvaartplan (HPP) vervang. Hiervolgens moet Namibië teen 2020 die mees mededingende ekonomie op die vasteland wees.Hopwood sê Namibië kon sedert 2012-’13 nog net agt plekke op die GCI klim – van 92ste tot 84ste. “Teen dié pas gaan dit Namibië 25 jaar neem om die topland in Afrika – Mauritius in die 45ste posisie – verby te steek. As Namibië se vorderingskoers nie verbeter nie, gaan die land sy Harambee-teiken eers teen 2041, en nie 2020 nie, bereik,” sê Hopwood.Groot spronge boontoe is nie onmoontlik nie. Hopwood gebruik Rwanda as voorbeeld. Dié land het vanjaar ses plekke op die GCI gestyg en is nou die derde mees mededingende ekonomie in Afrika. Botswana, tans in die vierde plek, het dit ook in die verlede bewys, sê hy.Om Namibië die mededingingsleer te laat klim, gaan daadwerklike pogings verg, sê Hopwood.Toegang tot finansiering is vanjaar uitgesonder as die grootste struikelblok om sake in Namibië te doen. Sowat 17,7% van respondente wat aan die WEF se uitvoerende meningsopname deelgeneem het, sê dié kwessie is die vernaamste probleem. Ongeveer 14,8% meen die onkundige arbeidsmag is die grootste kopseer, terwyl 10,3% die regering se rompslomp as ’n reusebelemmering ervaar. Sowat 10,2% beskou die swak werksetiek van Namibië se arbeidsmag as ’n doring in die vlees en 7,2% het korrupsie as hul grootste probleem geïdentifiseer.

Mededinging: Nam vorder teen slakkepas

Kommentaar

Republikein 2026-03-16

Meld asseblief aan om kommentaar te lewer

Mededinging: Nam vorder teen slakkepas

Kommentaar

Republikein 2026-03-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.