‘Beter’ diepvervalsings ’n kwelling vir die toekoms

Die Instituut vir Openbare Beleidsnavorsing (IPPR) sê hoewel diepvervalsings (deepfakes) in aanloop tot die algemene verkiesings in November 2024 van swak gehalte was en dus maklik uitgeken kon word, dit in die toekoms kan verbeter en is dié neiging dus kommerwekkend. In die verslag getiteld “Countering #Elections2024 Mis- & Disinformation” wat deur die IPPR en Namibia Fact Check vrygestel is, sê die IPPR die owerhede wat verantwoordelik is vir die bestuur van verkiesings was klaarblyklik nie voorbereid om waninligting, hoofsaaklik op sosialemedia- en boodskapplatforms, teen te werk nie. Die IPPR stel voor dat die Verkiesingskommissie van Namibië (ECN) die voorstelle van die Vereniging van Verkiesingsowerhede in Afrika (AAEA) implementeer, wat die ECN self help ontwikkel het.Die IPPR sê die leier van die Independent Patriots for Change (IPC), Panduleni Itula, Swapo se presidensiële kandidaat, Netumbo Nandi-Ndaitwah, en die ECN was die teiken van smeerveldtogte. Swak joernalistiek het ook gelei tot verwarring en die aanblaas van waninligting, volgens die IPPR. Die IPPR gebruik voorbeelde uit ’n plaaslike staatsbeheerde dagblad wat berig het dat Nandi-Ndaitwah tydens ’n saamtrek gesê het sy sou 5 000 werksgeleenthede in vyf jaar skep. In werklikheid het sy gesê sy sou meer as 500 000 werksgeleenthede in daardie tyd skep.Dieselfde dagblad het twee dae later berig dat die voormalige Britse hoë kommissaris, Charles Moore, ’n geleentheid op Walvisbaai bygewoon het.Die IPPR meen dié berig het sensasie gesoek en geloofwaardigheid verleen aan bewerings dat die IPC deur die Britse regering gefinansier word en dus in daardie administrasie se beste belange sou optree. ’n Ander dagblad in private besit het volgens die IPPR ook belangrike konteks weggelaat toe daar berig is dat die leier van die destydse amptelike opposisie, die Popular Democratic Movement (PDM), die sekretaris-generaal van Swapo, Sophia Shaningwa, blameer het vir wind wat tente by ’n PDM-geleentheid beskadig het. “Die berig het versuim om dit duidelik te maak dat Venaani se opmerkings as ’n grap gemaak is, maar het dit eerder as ’n ernstige beskuldiging aangebied. Sonder behoorlike evaluering, floreer waninligting,” lui die IPPR se verslag. Volgens die IPPR het die internasionale media ook tot waninligting bygedra. – irene-mari@nmh-hub.com.na

‘Beter’ diepvervalsings ’n kwelling vir die toekoms

Kommentaar

Republikein 2025-10-16

Meld asseblief aan om kommentaar te lewer

‘Beter’ diepvervalsings ’n kwelling vir die toekoms

Kommentaar

Republikein 2025-10-16

Meld asseblief aan om kommentaar te lewer

MELD AAN

Advertensie