Briewe uit die binneland – Die skuifelende kerke (deel 1)

Ek waardeer opnuut die simboliek in verhale nadat ek die Nederlandse skrywer Jan Terlouw se jeugroman, Koning van Katoren, gelees het. Daarin word die verhaal vertel van ? jong seun Stach wat wees gelaat is en deur sy oom Gervaas grootgemaak is. Op ? nag in die land Katoren, sterf die bejaarde koning, en nie ver daarvandaan nie, word ? seuntjie gebore. Twee belangrike dinge gebeur kort daarna. As ? koning sterf, vind daar ? verskuiwing van mag plaas wat soms geweldige gevolge kan hê, en as ? kindjie gebore word, verander dinge ook drasties: daar is nou ? iemandjie vir wie daar gesorg moet word. Veral as die kindjie wees gelaat word omdat sy ma by sy geboorte sterf, en sy pa op dieselfde dag in ? fratsongeluk omkom.Die seuntjie se oom Gervaas, ? getroue onderdaan van die geliefde ou koning, verloor op dieselfde dag drie mense wat hy liefgehad het: sy werkgewer van meer as dertig jaar, sy jonger broer en sy skoonsuster. Verkieslik wou hy ook sterf, maar moes sy planne uitstel, want hy sal nou vir klein Stach moet sorg. In die gestorwe koning se paleis besluit ses ministers om intussen die mag te gryp met die idee dat hulle onder mekaar sou uitwerk wie die nuwe koning moet word. Daarvan het egter vere gekom, en die ses ry vir die volgende stuk of sestien jaar lekker op die soustrein. Gervaas bly in hulle diens.Op dag een toe Gervaas klein Stach in sy sorg neem, besluit hy dat die klein mannetjie nie eendag so ? gedweë onderdanige man soos hy wat Gervaas is, moet word nie, en maak die kind alternatief groot. Hy vermaan hom net op die nodigste tye, en laat toe dat hy meestal self besluite neem. Boonop droom hy een nag dat Stach die nuwe koning gaan word. Intussen besluit die ministers om Gervaas tot ridder te slaan vir al sy jare van getroue diens – dertig vir die ou koning en nog sestien vir die ses treinryende ministers. Gervaas sê nee dankie, hy wil nie gedekoreer word nie; hy wil liewer dat die ministers aan klein Stach ? onderhoud toestaan, want hy is immers gebore 17 jaar gelede op dieselfde dag toe die geliefde ou koning gesterf het. Toe die tiener ? paar dae later voor die ry ministers in die goudversierde raadskamer staan, vra Stach wat jy moet doen om koning van Katoren te word. Hulle kon hom nie sommer opsy skuif toe hulle klaar gelag het nie, want daar was joernaliste wat die saak fyn dopgehou het, en boonop was dit immers hoogtyd om ? koning aan te wys. Na nog ? week se geredekawel onder mekaar besluit die ministers dat elkeen van hulle vir hom ? opdrag sal gee wat hy suksesvol moet uitvoer as hy koning wil word. Die skrywer van hierdie fantasie-cum-wetenskapfiksieboek laat die ministers toe om die verskriklikste opdragte uit te dink wat enige tiener se verbeelding sou aangryp. Nadat Stach die eerste godsonmoontlike opdrag suksesvol uitgevoer het, stroom daar briewe in van regoor die land na die raad van misterie wat gaan oor yslike probleme wat Stach assegrootblief vir die burgers moet kom oplos. Vir my was die geval van die skuifelende kerke van die stad Uikumene die aangrypendste. Die burgemeester van Uikumene was ? goeie man, en het al twaalf kerke in die stad ondersteun en hulle verrigtinge bygewoon. Die probleem was net dat hierdie massiewe konstruksies nie soos ander geboue oral op die wêreld op een plek bly staan het nie, maar dat hulle al skuifelend veel chaos in die stad veroorsaak het! Geen wonder dat die wyse burgemeester Stach se hulp ingeroep het nie. Liewe leser, volgende Dinsdag vertel ek verder oor hoe Stach die weerbarstige religieuse geboue tot ? eenheid saamgesnoer het. – beukemuir@gmail.com* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Network Media Hub (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.

Briewe uit die binneland – Die skuifelende kerke (deel 1)

Kommentaar

Republikein 2025-11-05

Meld asseblief aan om kommentaar te lewer

Briewe uit die binneland – Die skuifelende kerke (deel 1)

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.