‘Meatco is in ’n regrukfase’

’n Reusetaak lê op die skouers van die nuwe uitvoerende hoof van Meatco om die maatskappy weer tot sy ou glorie te herstel. Die sluitingsdatum vir aansoeke vir die uitdagende pos is 21 Februarie en die kontraktydperk is vyf jaar. Dit volg nadat die kontrak van die voormalige uitvoerende hoof, Mwilima Mushokabanji, verstryk het.Patrick Liebenberg, Meatco se voormalige hoof van veeverkryging en -produksie, is op 1 Februarie vir ses maande as die waarnemende uitvoerende hoof aangestel. Hy het tydens ’n onderhoud met Agri Monitor bevestig dat hy nie vir dié pos gaan aansoek doen nie, maar hy is baie positief oor die toekoms van die maatskappy.Liebenberg het erken: “2023 was hel! Meatco is in ’n regrukfase en het reeds ’n 180 grade-ommekeer gemaak. Ons het drie goeie jare nodig, dan is ons weer die Meatco van ouds, maar elke werknemer moet baie hard werk,” het hy gesê.Liebenberg, ’n boerseun van Tsumeb, is die man agter die skerms wat praktiese dinge in die abattoir en fabriek wil vasvat en regruk. Raadsale en vergaderings met ministers is nie vir hom nie en ’n regruktydperk van ses maande is te kort, maar hy meen hy kan ’n verskil maak deur besluite vinniger te laat deurvoer. “Die maatskappy moet funksioneel wees en ons is ver gevorderd om die kernfunksie in Meatco reg te kry.”Liebenberg het beklemtoon boere moet net produseer en nie bekommerd oor Meatco wees nie: “Die boere is vindingryk genoeg om te produseer, maar hulle moet ’n stabiele, veilige hawe vir hul beeste gevestig hê.” Hy het bygevoeg: “Die boer wil ’n slagplek, sekerheid en die beste prys hê. Boere moet ’n regverdige prys kry.”LEDEVERGADERING SUKSESVOLDie beleërde maatskappy het op 11 Februarie sy ledevergadering in die hoofstad gehad met sowat 100 lede wat dit bygewoon het. Die Lewendehaweprodusente-organisasie (LPO) het die ledevergadering as suksesol beskryf. “Die vergadering het die verskeie sake bespreek, die jaarverslag van 2023-’24 uitgereik, asook ’n hersiening van die omkeerstrategie en ander kwessies wat deur produsente geopper is. “Tydens die vergadering het Meatco waardevolle terugvoer gegee, met die fokus op die finansiële verslae, wat ’n paar uitdagings vir die bestuurspan weerspieël het,” sê die LPO. “Terwyl die huidige finansiële toestand van die maatskappy nie ideaal is nie, is daar ’n belowende vooruitsig vir die volgende finansiële jaar. “Veral die finansiële posisie vir die huidige boekjaar en die periode van 10 maande waaroor die huidige raad kan rapporteer, skep ’n optimistiese pad vorentoe vir die maatskappy.”Die LPO voeg by: “As ons vorentoe kyk, bly Meatco se bestuurspan daartoe verbind om vooruitgang te dryf en voort te bou op die positiewe baan wat daargestel is. Die LPO meen as ’n noodsaaklike speler in die landbousektor is Meatco se stabiliteit deurslaggewend vir die hele bedryf, en die maatskappy is vasbeslote om mededingend en volhoubaar te bly. “Dit is belangrik om te let op die belangrike rol wat die ministerie van finansies in die herstel van Meatco gespeel het. Sonder die ministerie se ingryping en finansiële bystand sou Meatco dalk nie die geleentheid gehad het om suksesvol te herstel nie.” Die LPO bedank die ministerie en Meatco se raad vir hul bydrae om die voortgesette sukses en groei van die maatskappy te verseker. “Dit is belangrik dat Meatco verbind bly tot sy strategiese doelwitte en die noodsaaklike taak om ’n stabiele en welvarende landbousektor te verseker.”Volgens die verslag het Meatco gedurende die 2023-’24-boekjaar N$964 miljoen aan produsente betaal om primêre veeproduksie in die nasionale belang van Namibië te beskerm. Die bedrag wat in 2022-’23 deur Meatco aan produsente betaal is, was N$560 miljoen, berig Ellanie Smit.“Deur konsekwent volhoubare markverwante pryse te betaal, sal dit produsente in staat stel om hul produksiemetodes en diversiteit tussen speenkalf- en slagosproduksie te beplan,” lui die verslag.VERSLAGTINGMeatco het vir die eerste keer in drie jaar daarin geslaag om die 60 000-kerf vir beesverslagtings te oortref.Luidens die verslag het Meatco 60 820 beeste suid van die veeartsenykordonheining (bekend as die Rooilyn) tydens 2023-’24 geslag in vergelyking met 33 144 beeste wat die vorige jaar geslag is. Daar is begroot om 50 000 beeste te slag.Noord van die Rooilyn is 4 607 beeste in 2023-’24 verkoop vergeleke met die 3 779 wat in 2022-’23 geslag is.UITVOEREMeatco het 29 120 ton beesvleis verkoop, wat 19 760 ton meer is as in 2022-’23 toe 9 360 ton verkoop is, wat sy inkomste met N$440 miljoen verhoog het vergeleke met die vorige jaar.Van die 29 120 ton beesvleis en vleisprodukte wat met bene verkoop is, het Meatco 60% van die volume aan uitvoermarkte verkoop, wat 75% van die totale inkomste gegenereer het.Volgens die verslag het internasionale verkope N$956 miljoen opgelewer vergeleke met N$564 miljoen in 2022-’23.Uit die Europese Unie (EU) is 42% van die totale inkomste gegenereer, Noorweë 17%, Suid-Afrika 8% en China en die res van Asië 6%. Altesaam 21% beesvleis is plaaslik verkoop.– francoise@nmh.com.na

‘Meatco is in ’n regrukfase’

Kommentaar

Republikein 2025-12-16

Meld asseblief aan om kommentaar te lewer

‘Meatco is in ’n regrukfase’

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.