‘Namibiërs welkom in VSA’

Namibië is nie ingesluit by die proklamasie dat burgers van sekere lande vanaf 9 Junie verbied sal word om die Verenigde State van Amerika (VSA) binne te gaan weens daardie lande se nasionale veiligheids- en openbare veiligheidstekortkominge nie. “Ons beklemtoon dat Namibië nie in hierdie proklamasie ingesluit is nie en daar geen veranderinge aan visumgeskiktheid vir Namibiese burgers was nie,” het die waarnemende woordvoerder van die Amerikaanse ambassade in Windhoek, Rachelle Duck, gister in ’n mediaverklaring gesê.Sy sê die Amerikaanse ambassade in Windhoek herbevestig sy sterk bilaterale vennootskap met Namibië en wil duidelikheid verskaf oor onlangse opdaterings aan die Amerikaanse visumbeleid en die bestaande reiskennisgewing vir Namibië.“Die Verenigde State waardeer sy mense-tot-mense bande met Namibië en Namibiërs wat die Amerikaanse immigrasiereëls volg, word steeds as besoekers, studente en sakereisigers verwelkom. Die ambassade bly oop,” lui die verklaring. Duck verduidelik as deel van die VSA se voortgesette verbintenis tot deursigtigheid en wedersydse begrip, wil die land konteks bied oor die huidige vlak 2-reiskennisgewing en bevestig dat Namibiërs nie geraak word deur die proklamasie van 9 Junie 2025 wat toegang tot burgers van sekere lande beperk nie.Sy sê die Amerikaanse regering reik elke jaar ’n nuwe reiskennisgewing vir elke land in die wêreld uit. “Die huidige vlak 2-reiskennisgewing vir Namibië is op 23 Desember 2024 hernu. Ten spyte van onlangse vermeldings in plaaslike media, het die algehele vlak sedert 2023 onveranderd gebly.” Die kennisgewing beveel reisigers aan om “verhoogde versigtigheid uit te oefen” weens gesondheids- en misdaadoorwegings. “Namibië se huidige vlak is algemeen in baie lande wêreldwyd, insluitend lande soos die Verenigde Koninkryk, Frankryk en Duitsland en dien as algemene riglyne om reisigers te help om ingeligte besluite te neem rakende die risiko’s van internasionale reise,” lui die verklaring.Duck sê dit beperk nie reis- of visumverwerking nie en moet nie as ’n strafmaatreël geïnterpreteer word nie. “Namibië bly ’n verwelkomende bestemming vir Amerikaanse reisigers en bilaterale reise tussen ons lande duur voort. “Ons waardeer die voortgesette betrokkenheid tussen die VSA en Namibië en bly daartoe verbind om wedersydse begrip en samewerking oor ’n reeks gedeelde prioriteite te versterk.”Die Amerikaanse president, Donald Trump, het verlede week ’n proklamasie onderteken wat die burgers van 12 lande verbied om Amerika binne te kom. Die lande is Afganistan, Mianmar, Tsjad, die Demokratiese Republiek die Kongo, Ekwatoriaal-Guinee, Eritrea, Haïti, Iran, Libië, Somalië, Soedan en Jemen.Die toegang van mense van Burundi, Kuba, Laos, Sierra Leone, Togo, Turkmenistan en Venezuela sal gedeeltelik beperk word.Vir meer inligting oor reise na die Verenigde State of die huidige reisadvies vir Namibië, besoek https://travel.state.gov/ of https://na.usembassy.gov. – republikein@republikein.com.na

‘Namibiërs welkom in VSA’

Kommentaar

Republikein 2025-12-19

Meld asseblief aan om kommentaar te lewer

‘Namibiërs welkom in VSA’

Kommentaar

Republikein 2025-12-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.