Netumbo verklaar ’n huis, vier erwe en ’n plaas in 2023

Voor haar aanstelling as visepresident het president Netumbo Nandi-Ndaitwah eienaarskap van ’n huis in Windhoek, ’n erf op Hentiesbaai, ’n erf op Okongo, twee erwe op Eenhana en ’n plaas van 5 220 hektaar op ’n onbekende ligging verklaar.Dié bates is in 2023 verklaar terwyl sy as parlementslid gedien het. Volgens parlementslede (LP’s) se verklaarde bateregister het sy ook een bul, geskenk deur die Omaheke-gemeenskap, en vier verse van die Otjozondjupa-gemeenskap, gelys.Nandi-Ndaitwah het geen aandele, finansiële belange of eksterne besoldigde indiensneming aangemeld nie, maar het die Verenigde Nasies se Opvoedkundige, Wetenskaplike en Kulturele Organisasie (Unesco) onder die borgskapafdeling aangehaal.In Maart 2023 het wyle president Hage Geingob Nandi-Ndaitwah as Swapo se presidensiële kandidaat vir die algemene verkiesing in 2024 aangewys. Ná Geingob se dood in Februarie 2024 is sy as Swapo se visepresident aangestel, waar sy Nangolo Mbumba opgevolg het, wat president geword het. Haar aanstelling was ’n geskiedkundige mylpaal as die eerste vrou wat in daardie rol gedien het.Op 3 Desember 2024 is sy amptelik as die aangewese president van Namibië verklaar, nog ’n eerste vir ’n vrou in die land. Nandi-Ndaitwah het 683 560 stemme op haar verenig, wat 58,7% van die totale stemme verteenwoordig en dr. Panduleni Itula van die Independent Patriots for Change (IPC) en McHenry Venaani van die Popular Democratic Movement (PDM) verslaan. Sy is op 21 Maart 2025 as president ingehuldig.As lid van die Nasionale Vergadering (NV) sedert 1990 het Nandi-Ndaitwah vanaf 1990 tot 1996 as die adjunkminister van buitelandse sake gedien. Sy het in 1996 ministeriële status bereik as direkteur-generaal van vrouesake in die kantoor van die president, waar sy tot 2000 gedien het. Sy het daardie jaar die minister van vrouesake en kinderwelsyn geword.Tussen 2005 en 2010 het sy die inligting- en uitsaaiportefeulje beklee voordat sy as minister van die omgewing en toerisme aangestel is. In Desember 2012 is sy tydens ’n kabinetskommeling as minister van buitelandse sake aangewys, ’n rol wat later herdoop is na internasionale betrekkinge en samewerking.Onder president Geingob is Nandi-Ndaitwah in Maart 2015 as adjunk- eerste minister aangewys, terwyl sy haar rol as minister van internasionale betrekkinge en samewerking behou het. Sy dien op Swapo se sentrale komitee en politburo en as die party se sekretaris vir inligting en mobilisering, wat haar een van sy hoofwoordvoerders maak.– nikanor@nmh-hub.com.na

Netumbo verklaar ’n huis, vier erwe en ’n plaas in 2023

Kommentaar

Republikein 2025-05-21

Meld asseblief aan om kommentaar te lewer

Netumbo verklaar ’n huis, vier erwe en ’n plaas in 2023

Kommentaar

Republikein 2025-05-21

Meld asseblief aan om kommentaar te lewer

MELD AAN

Advertensie