Sterftes weens ‘voedselvergiftiging’ styg in Kavango-Oos
Versoek meer gesondheidsinspekteurs
Die aantal vermoedelike sterftes weens voedselvergiftiging in die Kavango-Oosstreek oor die afgelope twee jaar het tot 26 gestyg ná die dood van twee jong kinders in die Korokoko-nedersetting in die Ndiyona-kiesafdeling oor die naweek.Dit is Woensdag tydens ’n mediakonferensie op Rundu bevestig, waar die streek se goewerneur, Hamunyera Hambyuka, sy kommer uitgespreek het oor die voortdurende lewensverliese as gevolg van besmette of swak voorbereide voedsel.
Die jongste voorval het Sondag in die vroeë oggendure plaasgevind nadat verskeie lede van ’n huishouding siek geword het nadat hulle na bewering die vorige dag kassawewortels geëet het.
Volgens Hambyuka dui voorlopige ondersoeke daarop dat die kassawe, wat bekend is as giftig indien dit nie behoorlik verwerk word nie, deur die ma van een van die kinders gaargemaak is. Die slagoffers, onderskeidelik drie en vier jaar oud, het Saterdagaand saam met ’n volwassene begin naar word.
Die kinders het net ná middernag tuis gesterf, terwyl drie ander in die Nyangana-staatshospitaal opgeneem is, waar hulle in ’n stabiele toestand is.
“Dit bring die totale aantal sterftes as gevolg van vermoedelike voedselvergiftiging in ons streek op 26 te staan,” het Hambyuka gesê.
“Dis verpletterend om kinders op hierdie manier te verloor. Dit is lewens wat tot die toekoms van ons land kon bygedra het.”
VERSLAE VERTRAAG
Die goewerneur het vroeëre gevalle aangehaal, insluitend die sterfte van drie minderjariges in die Livayi-nedersetting in Februarie 2024 nadat hulle “mutete”, pap en melk geëet het, asook die dood van die driejarige Helena Maliro in Junie dieselfde jaar.
In beide voorvalle is amptelike verslae oor die oorsaak van die sterfes óf vertraag óf nooit vrygestel nie, wat kritiek van geraakte families en die breër gemeenskap ontlok het.
Tydens die inligtingsessie het Hambyuka groter waaksaamheid en samewerking van die publiek versoek en gesondheids- en wetstoepassingsowerhede aangespoor om hul inspeksies van voedselprodukte wat by dorpe en handelsentrums verkoop word, te verskerp.
“Die voortgesette herhaling van hierdie voorvalle is onaanvaarbaar,” het hy gesê.
“Ek doen ’n beroep op gemeenskappe om versigtig te wees, verdagte voedselprodukte te vermy en enige simptome onmiddellik by nabygeleë gesondheidsgeriewe aan te meld.”
Die voorval het frustrasies oor die gebrek aan deursigtigheid van die ministerie van gesondheid en maatskaplike welsyn weer aangewakker.
Verlede jaar het ’n ondersoek deur Network Media Hub (NMH) uitgelig dat baie voorvalle van voedselvergiftiging, veral dié wat kassawe betrek, onopgelos bly, met geen amptelike bevindinge wat met die publiek gedeel word nie.
TAKEL KRISIS
Hambyuka het die gebrek aan institusionele kapasiteit erken om die krisis doeltreffend te takel, maar het ’n beroep op die gesondheidsministerie gedoen om toesigmeganismes te versterk, veral in landelike gebiede.
Hy het ook gevra vir die ontplooiing van meer gesondheidsinspekteurs om die verkoop van vervalde en potensieel skadelike voedsel te monitor.
“Gesondheidsinspekteurs moet verseker dat onveilige produkte uit sirkulasie verwyder word,” het hy gesê.
“Ons kan nie meer bekostig om dit as ’n seisoenale of geïsoleerde kwessie te hanteer nie.”
Hy het tradisionele en politieke leiers aangespoor om ’n aktiewe rol te speel in die opvoeding van gemeenskappe oor veilige voedselvoorbereiding, veral met kassawe en ander inheemse plante wat bekend is as gevaarlik as dit nie korrek hanteer word nie.
Die goewerneur het gesê sy kantoor bly oop vir enigiemand wat bereid is om inligting te deel wat die polisie kan help om die oorsaak van die jongste voorval te identifiseer.
Intussen ontvang die bedroefde familie sielkundige ondersteuning van die gesondheidsministerie se maatskaplike werkers wat by die Nyangana-hospitaal gestasioneer is.
– [email protected]
Die jongste voorval het Sondag in die vroeë oggendure plaasgevind nadat verskeie lede van ’n huishouding siek geword het nadat hulle na bewering die vorige dag kassawewortels geëet het.
Volgens Hambyuka dui voorlopige ondersoeke daarop dat die kassawe, wat bekend is as giftig indien dit nie behoorlik verwerk word nie, deur die ma van een van die kinders gaargemaak is. Die slagoffers, onderskeidelik drie en vier jaar oud, het Saterdagaand saam met ’n volwassene begin naar word.
Die kinders het net ná middernag tuis gesterf, terwyl drie ander in die Nyangana-staatshospitaal opgeneem is, waar hulle in ’n stabiele toestand is.
“Dit bring die totale aantal sterftes as gevolg van vermoedelike voedselvergiftiging in ons streek op 26 te staan,” het Hambyuka gesê.
“Dis verpletterend om kinders op hierdie manier te verloor. Dit is lewens wat tot die toekoms van ons land kon bygedra het.”
VERSLAE VERTRAAG
Die goewerneur het vroeëre gevalle aangehaal, insluitend die sterfte van drie minderjariges in die Livayi-nedersetting in Februarie 2024 nadat hulle “mutete”, pap en melk geëet het, asook die dood van die driejarige Helena Maliro in Junie dieselfde jaar.
In beide voorvalle is amptelike verslae oor die oorsaak van die sterfes óf vertraag óf nooit vrygestel nie, wat kritiek van geraakte families en die breër gemeenskap ontlok het.
Tydens die inligtingsessie het Hambyuka groter waaksaamheid en samewerking van die publiek versoek en gesondheids- en wetstoepassingsowerhede aangespoor om hul inspeksies van voedselprodukte wat by dorpe en handelsentrums verkoop word, te verskerp.
“Die voortgesette herhaling van hierdie voorvalle is onaanvaarbaar,” het hy gesê.
“Ek doen ’n beroep op gemeenskappe om versigtig te wees, verdagte voedselprodukte te vermy en enige simptome onmiddellik by nabygeleë gesondheidsgeriewe aan te meld.”
Die voorval het frustrasies oor die gebrek aan deursigtigheid van die ministerie van gesondheid en maatskaplike welsyn weer aangewakker.
Verlede jaar het ’n ondersoek deur Network Media Hub (NMH) uitgelig dat baie voorvalle van voedselvergiftiging, veral dié wat kassawe betrek, onopgelos bly, met geen amptelike bevindinge wat met die publiek gedeel word nie.
TAKEL KRISIS
Hambyuka het die gebrek aan institusionele kapasiteit erken om die krisis doeltreffend te takel, maar het ’n beroep op die gesondheidsministerie gedoen om toesigmeganismes te versterk, veral in landelike gebiede.
Hy het ook gevra vir die ontplooiing van meer gesondheidsinspekteurs om die verkoop van vervalde en potensieel skadelike voedsel te monitor.
“Gesondheidsinspekteurs moet verseker dat onveilige produkte uit sirkulasie verwyder word,” het hy gesê.
“Ons kan nie meer bekostig om dit as ’n seisoenale of geïsoleerde kwessie te hanteer nie.”
Hy het tradisionele en politieke leiers aangespoor om ’n aktiewe rol te speel in die opvoeding van gemeenskappe oor veilige voedselvoorbereiding, veral met kassawe en ander inheemse plante wat bekend is as gevaarlik as dit nie korrek hanteer word nie.
Die goewerneur het gesê sy kantoor bly oop vir enigiemand wat bereid is om inligting te deel wat die polisie kan help om die oorsaak van die jongste voorval te identifiseer.
Intussen ontvang die bedroefde familie sielkundige ondersteuning van die gesondheidsministerie se maatskaplike werkers wat by die Nyangana-hospitaal gestasioneer is.
– [email protected]
Kommentaar
Republikein
Geen kommentaar is op hierdie artikel gelaat nie