‘Jannie was ’n yster’

Die oorsaak van ’n vliegongeluk waarin ’n bekende boer van die Suide, Jannie Spangenberg (53), Saterdag gesterf het, is steeds ’n raaisel.Volgens die Namibiese polisie (Nampol) het Spangenberg glo saam met sy seun, Gerrit, die plaas Gras Ranch naby Kalkrand gepatrolleer toe die mikrovliegtuig waarin hulle gevlieg het, neergestort het.Die waarnemende bevelvoerder vir Nampol in die Hardapstreek, adjunkkommissaris John Mwatongwe, het bevestig dat Gerrit slegs ligte beserings opgedoen het. Die ondersoekbeampte Hafeni Mweshixwa van die direktoraat vir vliegtuigongelukondersoeke (DAAII) in die ministerie van werke en vervoer het die ongelukstoneel besoek, maar kon teen druktyd nog nie enige inligting bekend maak nie. Hy het gister weer die ongelukstoneel in ’n bergagtige gebied besoek en ’n voorlopige ondersoekverslag sal na verwagting binnekort deur die DAAII uitgereik word.Spangenberg was die enigste kind en word oorleef deur sy ma, Marie, ’n inwoner van die Oude Rust-ouetehuis in Windhoek, asook sy vrou, Anri, seun Gerrit en dogter Anja. Anja is tans ’n student in forensiese rekenmeesterskap aan die Noordwes-universiteit in Potchefstroom en Gerrit het sy pa met die boerdery gehelp. Die Spangenberg-gesin se buurman, Corne Kruger, wat saam met Jannie grootgeword het, twyfel nie oor sy vaardighede as vlieënier nie. “Hy was ’n ongelooflike goeie mikrovliegtuigvlieënier. Ek het al baie saam met hom gevlieg,” sê hy.Kruger het bewerings dat Spangenberg op dié noodlottige dag ’n lugpatrollie uitgevoer het op soek na jagluiperds wat glo die afgelope paar jaar mens-dier-konflik vir boere in die gebied veroorsaak het weens toenemende bevolkingsyfers, as blote gerugte afgemaak. “Daar is ’n kans dat hulle na ongediertes soos ook jakkalse gesoek het, maar hierdie is alles bewerings,” sê hy.Kruger sê Jannie was ’n vrygewige mens. “Jannie was ’n yster. Waar daar ouers in die omgewing was wat tydens die droogte nie hul kinders se skoolfondse kon betaal nie, het hy dit betaal,” sê Kruger. Huldeblyke het ook vir Jannie op sosiale media ingestroom. Anstie Scholtz skryf op Facebook: “My liewe nefie, ons harte is geruk.”“Dit is baie slegte nuus. Jannie was regtig ’n baie goeie mens, reguit en eerlike besigheidsman. Baie sterkte aan Anri en die familie,” sê John Redman. André van der Walt skryf: “Jannie my ou maat, jy sal baie gemis word,” en George Coetzee sê: “Yoh. Hy was ’n ongelooflike mens gewees.”– irene-mari@nmh-hub.com.na

‘Jannie was ’n yster’

Kommentaar

Republikein 2025-07-29

Meld asseblief aan om kommentaar te lewer

‘Jannie was ’n yster’

Kommentaar

Republikein 2025-07-29

Meld asseblief aan om kommentaar te lewer

MELD AAN

Advertensie