Vlieënier, passasiers veilig ná noodlanding

Juandre Gouws en Luciano Kooitjie, twee ervare toergidse, moes die woestyn in die donker aandurf om ses passasiers en 'n vlieënier te red, nadat die vliegtuig tydens ‘n panoramavlug Dinsdagaand 'n noodlanding naby Meobbaai gemaak het.Die vliegtuig wat deur Eagle Eye Aviation bedryf word, was besig met 'n Sossusvlei Classic Scenic Flight toe dit gedwing is om 'n noodlanding te maak ongeveer 200 kilometer suid van Walvisbaai tussen Meobbaai en Grillenberger, 'n verlate diamantmynbou-nedersetting in die Namibwoestyn.Volgens Kooitjie was die toestande tydens die reddingsoperasie “uitdagend”.“Die wind was nogal erg in die duine op pad na die terrein. Ons het omstreeks 02:23 by die vliegtuig aangekom en Walvisbaai voor 08:00 bereik,” het hy gesê.Die passasiers is saam met die vlieënier na ‘n hospitaal op die hawedorp vir mediese hulp gebring.Theunis Keulder, eienaar van Sandwich Harbour Tours 4x4, het die gidse se dapperheid geprys. “Dit was nogal uitdagend vir ons twee gidse om deur die nag in die duine te reis, maar hulle het die gebied goed geken en veilig teruggekeer. Die terugrit was stadig, aangesien die toeriste beserings opgedoen het,” het Keulder gesê.Amptenare van die Namibiese Burgerlugvaartowerheid (NCAA) sal na verwagting die ongelukstoneel besoek om die oorsaak van die noodlanding te ondersoek.In 'n amptelike verklaring het Eagle Eye Aviation verduidelik dat die vliegtuig, 'n GA8 Airvan, om 15:30 vertrek het en teen 18:00 na Swakopmund sou terugkeer.“Omstreeks 17:15 het ons bevestiging ontvang dat die vliegtuig 'n noodlanding in die Namibwoestyn uitgevoer het. Dit is deur ander lugverkeer in die omgewing bevestig. 'n Noodgrondreddingsoperasie is onmiddellik begin. Ongelukkig, as gevolg van kwynende daglig en moeilike landingstoestande, was 'n helikopteronttrekking nie haalbaar nie. Met die hulp van Pieter Karsten van Sandy Horizon Tours is twee voertuie op die aand van 14 Oktober vanaf Walvisbaai gestuur.” Volgens die maatskappy moes die twee bestuurders uitdagende woestynterrein, sterk winde en sandstorms navigeer om die vliegtuig uiteindelik omstreeks 02:30 die oggend van 15 Oktober te bereik.“Met hul terugkeer na Walvisbaai het alle betrokke individue mediese evaluerings by die Welwitschia-hospitaal as 'n voorsorgmaatreël ondergaan. 'n Volledige ondersoek word tans deur die direktoraat van vliegtuigongelukke en -ondersoeke (DAAI) gedoen. 'n Voorlopige verslag sal binnekort vrygestel word om die oorsaak van die noodlanding te bepaal.”Eagle Eye Aviation het hul dank uitgespreek teenoor elkeen wat by die reddingsoperasie betrokke was. “Ons wil graag ons opregte dank betuig aan Pieter Karsten, Luciano Kooitjie, Juandre Gouws, en al die ander wat betrokke was by die veilige terugkeer van ons passasiers en vlieënier. Jul toewyding en moed word opreg waardeer,” het die maatskappy gesê. - leandrea@erongo.com.na

Vlieënier, passasiers veilig ná noodlanding

Kommentaar

Republikein 2025-12-01

Meld asseblief aan om kommentaar te lewer

Vlieënier, passasiers veilig ná noodlanding

Kommentaar

Republikein 2025-12-01

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.