Reusebeloning ná renoster gestroop is

'n Beloning van N$160 000 is uitgeloof vir enige persoon met inligting wat sal lei tot die inhegtenisname van die stropers van 'n witrenosterkoei op 'n plaas in die Hardapstreek. Die renosterkoei wat gevind is met haar horing verwyder, se kalfie is ongedeerd.Volgens die plaaseienaar wie se naam om veiligheids- en sekuriteitsredes nie geplaas word nie, sê die vermoede is dat die voorval verlede naweek plaasgevind het terwyl die eienaars uitstedig was. Volgens hom was almal bewus van die feit dat die plaas Saterdag en Sondag onbeman sou wees terwyl hulle weg was. "Ons vermoed dat die koei Sondag gedurende die dag gestroop is, omdat die kalfie nie vir so lank sou kon oorleef het nie," het hy gesê. Volgens hom is daar eers die Maandagoggend op die karkas afgekom. Haar kalfie is Dinsdag gevind, nadat hulle vir spore begin soek het. Die eienaar het 'n beloning van N$100 000 uitgeloof, terwyl lede van die publiek wat die bewaring van renosters ondersteun, 'n verdere N$60 000 bygedra het. Die publiek is verlede week in ‘n verklaring gevra om te help met die ondersoek. “Ons vra jou hulp om die skuldiges van hierdie verskriklike misdaad aan die pen te laat ry. 'n Beloning van N$160 000 word aangebied vir inligting wat direk lei tot die inhegtenisneming en vervolging van diegene wat verantwoordelik is vir die stropery van 'n witrenosterkoei in die Hardapstreek,” lui die verklaring.Dit beklemtoon dat alle inligting streng vertroulik hanteer sal word. “Ons bly daartoe verbind om die veiligheid en vertroulikheid van enige persoon te beskerm wat na vore kom met nuttige inligting.”Adjunk-kommissaris Barry de Klerk, die hoof van die Blue Rhino-taakmag, was Saterdag op die toneel. Volgens De Klerk is die taakmag besig met die ondersoek en is daar tans nie verdere inligting beskikbaar nie.StygingNetwerk Media Hub (NMH) het in Februarie berig dat Namibië verlede jaar een van sy ergste jare vir renosterstropery in meer as 'n dekade beleef het, met 81 renosters wat onwettig gestroop is.Owerhede het 77 verdagtes in verband met renosterverwante misdade in hegtenis geneem. Hiervan was 73 Namibiese burgers. Beamptes het bevestig dat die land se stropingskrisis in 2015 ‘n hoogtepunt bereik het toe 97 renosters gestroop is. Dit is gevolg deur 84 gevalle in 2018 en 94 in 2022. Die stroperysyfers vir 2025 is nog nie bekendgemaak nie. - republikein@republikein.com.na

Reusebeloning ná renoster gestroop is

Kommentaar

Republikein 2025-12-18

Meld asseblief aan om kommentaar te lewer

Reusebeloning ná renoster gestroop is

Kommentaar

Republikein 2025-12-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.