Republikein Newspaper

Tielman van Lill – Die Capricorn Eagles, Namibië se nasionale senior vrouekrieketspan, het vandag sy onoorwonne veldtog in Kigali, Rwanda, by die Kwibuka T20-toernooi voortgesit toe hulle in hul derde kragmeting vir Botswana met 65 lopies oordonder het.
Namibië het eerste gekolf en 155 vir die verlies van net een paaltjie in hul toegelate 20 boulbeurte gemoker.
Suné Wittmann, wat as speler van die wedstryd gekroon was, het die grootste skade met 93* van 60 aflewerings aangerig. In die proses het sy nege viere en drie sesse grenstou toe gejaag.
Wittmann se kolftotaal is die hoogste wat enige kolwer nóg in ’n internasionale T20-wedstryd vir die nasionale vrouespan geslaan het, het Krieket Namibië se raaadslid vir die vrouespel, me. Hester Khan, bevestig. Dit is ook loshande die hoogste individuele telling van die toernooi sover.
Die paaltjiewagter Yasmeen Khan (31* van 29 b, 3x4) het enduit saam met Wittman die Botswana-boulaanval geteister.
Botswana kon slegs met 90/7 in 20 boulbeurte antwoord.
Kayleen Green (2/16 in 4 boulbeurte) en Victoria Hamunyela (2/11 in 4, 1 leeg) het die Eagles se boulwerk van die voorpunt gelei. Hulle is goed deur Sylvia Shihepo (1/13 in 3), Irené van Zyl (1/13 in 4) en Reehana Khan (1/19 in 2) bygestaan.
• Die rondomtaliefase eindig vandag wanneer die onoorwonne Namibië (drie gewen) en Kenia (twee gewen) se paaie kruis.
Die feit dat beide spanne feitlik verseker van die halfeindronde is, sal geen afbreuk doen aan hul ambisie om vandag as wenners van die veld te stap nie.
Kenia het gister vir Nigerië tot 108/5 beperk en het toe met agt paaltjies gewen (elf balle oor). Veronica Abuga (33) het die eerste ses van die toernooi geslaan.



FOTO’s: Twitter (@RwandaCricket) en Krieket Namibië