Windhoek het eerste Covid-19-sterfte

Die eerste Covid-19-verwante sterfte is volgens die minister van gesondheid en maatskaplike dienste, dr. Kalumbi Shangula in Windhoek aangemeld.
Shangula sê die 41-jarige man is Maandag met Covid-19-verwante simptome in die Katutura-hospitaal in die hoofstad opgeneem. Hy het ook ander chroniese mediese toestande gehad en is met sy opname getoets.
Volgens Shangula is hy Dinsdag in die hospitaal oorlede en het sy toetsuitslae gewys het hy positief vir die siekte getoets. Dit bring die nasionale totaal van sterftes op 10 te staan.

Gister is 66 nuwe gevalle aangemeld - 47 in Walvisbaai, vyf in Swakopmund en 14 in Windhoek. Dit bring die totaal vir die land op 2 052 te staan. Die gevalle in Windhoek is soos volg:

- 'n 29-jarige man met geen kontak met 'n bevestigde geval of reisgeskiedenis nie.

- 'n 36-jarige vrou en 'n kontak van 'n bevestigde geval.

- 'n 49-jarige man met geen kontak of reisgeskiedenis.

- 'n 12-jarige meisie en kontak van 'n bevestigde geval.

- 'n 42-jarige vrou wat 'n begrafnis op Gobabis bygewoon het.

- 'n 38-jarige man wat van Windhoek na Otapi en terug gereis het.

- 'n 31-jarige man van die militêre basis in Suiderhof.

- 'n 35-jarige manlike taxibestuurder.

- 'n 38-jarige vrou wat na Etosha en terug gereis het.

- 'n 34-jarige man wat tussen Angola en Namibië gereis het. Volgens Shangula word die besonderhede van die res van die gevalle nog versamel.

Intussen het 60 mense ten volle herstel en wel 58 in Walvisbaai en twee op Oshakati. Dit bring die totaal op 164 te staan. Tot op hede is 25 625 weefselmonsters getoets en is 1 587 mense tans in kwarantyngeriewe in die land.
– [email protected]