Wildshandel en korrupsie gaan hand aan hand

‘Dit begin met geringe misdaad’

07 May 2019 | Misdaad
Francoise Steynberg - Sonder korrupsie sal die nywerheidskaal van onwettige wildsmokkelary onmoontlik wees.

Só het dr. Tim Wittig verlede week by die internasionale konferensie van die Internasionale Raad van Wild en Wildbeskerming (CIC) in Windhoek gesê.

Wittig is die Basel Instituut se hoof van intelligensie en van die instituut se taakspan teen onwettige wildhandel.

“Jag vind al vir eeue plaas, maar vandag het onwettige wildhandel ’n professionele en wêreldwye misdadige bedryf geword, en dit kan met bewese strategieë gestop word,” het hy gesê.

“Wildstropers en plaaslike smokkelaars op voetsoolvlak dra die hoogste risiko en koste, maar maak bykans geen wins nie. Internasionale georganiseerde sindikate is professioneel, gesofistikeerd, gewelddadig, skeppend, aanpasbaar en kan nuwe markte maklik betree,” verduidelik Wittig.

“Dit is vervleg met ander bedreigings soos dwelm- en wapensmokkelary, korrupsie, oorgrensmisdaad, gewapende konflikte, staatsgrepe, politieke onstabiliteit en terrorisme.”

Wittig het kaarte van Oos-Afrika vertoon waar ivoorsmokkelary met mensehandel, heroïensmokkelary, korrupsie, konflik en volksmoord oorvleuel.

Volgens hom is wildprodukte soos ivoor, waarop beslag op skepe aan die ooskus van Afrika gelê is, teruggespoor na drie verskepingsmaatskappye, waarvan een deur die seun van ’n voormalige president besit word.

“Dit het tot die inhegtenisneming van eienaars en werkers van die verskepingsmaatskappye en ’n Keniaanse staatsamptenaar gelei,” het Wittig gesê.

“In Mosambiek oorvleuel die roetes van onwettige wildsmokkelaars met wapen- en heroïensmokkelaars en selfs radikale djihadiste-organisasies.”

Wittig meen onwettige wildhandel beloop wêreldwyd miljarde Amerikaanse dollar per jaar.

Wildprodukpryse, soos byvoorbeeld van renosterhoring, is al meer per kilogram as selfs kokaïen of goud.

Wittig sê die verband tussen onwettige jag, die onvolhoubare gebruik van wildprodukte en korrupsie begin met geringe misdaad soos byvoorbeeld permitbedrog.

“Dan volg die wanbesteding van ‘bewaringsfondse’, omkopery en betalings aan amptenare, samewerking tussen stropers en safari-operateurs, onwettige en onvolhoubare konsessiepraktyke en meer.”

Hy meen dit ís moontlik om korrupsie uit te roei.

“Daar is altyd goeie mense in slegte instellings. Vind hulle, help hulle en werk saam met hulle. ’n Klein netwerk van goeie mense kan meer doeltreffend as ’n groot instelling wees,” verduidelik Wittig.

“Verwag niks wanneer met korrupte mense gewerk word; werk om hulle en nie teen hulle nie.”

Wittig sê personeel op die middelvlak van misdaadsindikate is beter teikens as die baasbreine en kan makliker deur intelligensie en wetstoepassingspersoneel binnegedring word.

Hy verwys na geldskieters en base op plaaslike of streekvlak – veral diegene wat grensposte beheer, asook eienaars of operateurs van bote of vliegtuie wat die produkte uitsmokkel.

Volgens Wittig moet die geldspoor gevolg word en vereis dit strategieë wat al suksesvol in onwettige wildhandel-ondersoeke aangewend is, intelligensie en teikens, asook opleiding in teenkorrupsie.

Wittig sê intelligensie moet gereeld onder verskillende rolspelers gedeel word en samewerking tussen openbare, private en nieregeringsorganisasies is noodsaaklik.

“Gebruik alle moontlike wette om wildmisdadigers aan te kla, nie net wetgewing oor wildlewe en bosbou nie,” het Wittig beklemtoon.

Soortgelyk

 

B-dag: Maak of breek

54 minute gelede | Regering

Jo-Maré Duddy – Dolleë staatskoffers eerder as hemelhoë besteding is waarskynlik finansminister Iipumbu Shiimi se grootste uitdaging wanneer hy vanmiddag Namibië se moeilikste begroting sedert...

Stigma jeens lorriedrywers kwel

54 minute gelede | Vervoer

Ronelle Rademeyer en Francoise Steynberg – Lorriedrywers wat Namibië van noodsaaklike lewensmiddele voorsien en seker maak produkte bly op winkelrakke, bevind hulle terselfdertyd aan die...

‘Hongerpandemie’ lê vir wêreld op loer

54 minute gelede | Byvoegsels

Ronelle RademeyerDie wêreld se ekonome en beleidmakers twyfel nie meer daaraan dat die wêreldekonomie weens die Covid-19-krisis in ’n resessie gedompel gaan word nie. Trouens,...

Weer vir 27 Mei 2020

54 minute gelede | Weer

BINNELAND: Koud aanvanklik, maar andersins gedeeltelik bewolk en matig in die Suide. Elders sal dit gedeeltelik bewolk en matig tot warm wees.KUS: Gedeeltelik bewolk en...

Polisie lê beslag op sestig bokse vol drank

54 minute gelede | Misdaad

Francoise Steynberg – Die Namibiese polisie het Maandag knap ná middernag in Pionierspark op 60 bokse drank beslag gelê.Drie verdagtes is in hegtenis geneem, het...

Chaos toe jonges op vulstasie afpyl

54 minute gelede | Ongelukke

Drie jong mans wie se name in dié stadium onbekend is, het op 23 Mei om 01:00 'n ongeluk by die Total-vulstasie in Outjo veroorsaak...

Stappe by Covid-drywer se stoppe

54 minute gelede | Gesondheid

Leandrea Louw en Denver Kisting – 'n Handelsbank op Walvisbaai wat 'n Covid-19-geval onlangs besoek het, sê hulle het die personeel van daardie dag vervang...

Etosha Sondagmiddag deur aardbewing geskud

54 minute gelede | Ongelukke

Ronelle Rademeyer - ’n Aardbewing van 4,7 op die Richterskaal het Sondag om 16:42 in die Etosha nasionale park voorgekom.Me. Gloria Simubali, adjunk uitvoerende direkteur...

Medelye stroom in vir man wat aan Covid-19 sterf

54 minute gelede | Gesondheid

Ronelle Rademeyer – Medelye stroom glo in vir die familie van die Namibiër wat Saterdag in Nottingham, ­Engeland, aan die coronavirussiekte (Covid-19) dood is.Die minister...