Watwou troebel water
Windhoek se water is glo bruin "omdat boorgatwater uit die akwifer gepomp word".
Elvira Hattingh
Windhoek se inwoners kla hul kraanwater is bruin.
Maar die munisipaliteit het stadsbewoners opnuut die versekering gegee dat die water van uitstekende gehalte is en heeltemal veilig vir menslike gebruik.
Dit volg nadat verskeie foto's van water, wat in sommige gevalle soos swart koffie lyk, op sosiale media versprei is.
Inwoners van onder meer Rocky Crest, Windhoek-Wes en Kleine Kuppe het gekla hul badwater is bruinerig. Ander sê hul wit wasgoed verkleur bruin. En verskeie mense sê hulle drink lankal nie meer Windhoek se kraanwater nie.
Die munisipaliteit het onlangs 'n verklaring uitgereik om te sê hulle is bewus van die klagtes, maar hulle hou steeds streng by hul gehaltebeheerprogram. Bekommerde inwoners kan wel met die munisipaliteit se wetenskaplike afdeling by (061) 290 3462/3469/3470 in verbinding tree, veral in gevalle waar die water voortdurend verkleur is.
“Ons kraanwater word daagliks getoets om seker te maak dit voldoen aan die standaarde soos voorgeskryf deur die wêreldgesondheidsorganisasie (WHO),” het die munisipaliteit se woordvoerder, me. Lydia Amutenya, gesê.
Volgens 'n kennisgewing wat intussen deur die munisipaliteit uitgereik is, kan daar verskeie redes vir die bruin water wees.
“Die voortdurende waterkrisis het die munisipaliteit geforseer om beduidende veranderinge aan die stad se watertoevoerstelsel te maak.
Tans pomp ons groot hoeveelhede ondergrondse water – meer as ooit vantevore – uit die Windhoek-akwifer.
“Soos die pompprogram uitbrei, moet ons steeds die toestand van die water by verskeie van die nuwe boorgate bepaal. Die hersamestelling van die waterverspreidingstelsel kan egter ook veroorsaak dat residu, wat lank reeds in pype lê, opnuut weer hul weg na reservoirs en verbruikers vind,” lui die kennisgewing.
Die munisipaliteit sê Windhoek se waternood is steeds kritiek, maar tog het waterbesparings in Januarie tot onder 25% geval. Dit is die swakste besparing in die afgelope agt maande, behalwe vir November verlede jaar toe waterbesparing ook lae vlakke bereik het.
“Rondom Kersfees en Nuwejaar is tot 45% water bespaar, maar ná die feesseisoen het dit vinnig weer tot 30% gedaal, voor dit nou weer tot 24% geval het,” het Amutenya gesê.
“Die rede vir die aanvanklike goeie besparings kan toegeskryf word aan die feit dat mense weg was met vakansie. Maar ons vra Windhoekers steeds om soveel water as moontlik te bespaar.
“Ten spyte van die bietjie reën wat reeds geval het, het dit nog nie verligting vir Windhoek se waternood gebring nie, omdat baie min water die Von Bach-, Omatako- en Swakoppoortdam binnegevloei het,” het sy gesê.
“Die watertoevoersituasie bly dus kritiek.”
Windhoek se inwoners kla hul kraanwater is bruin.
Maar die munisipaliteit het stadsbewoners opnuut die versekering gegee dat die water van uitstekende gehalte is en heeltemal veilig vir menslike gebruik.
Dit volg nadat verskeie foto's van water, wat in sommige gevalle soos swart koffie lyk, op sosiale media versprei is.
Inwoners van onder meer Rocky Crest, Windhoek-Wes en Kleine Kuppe het gekla hul badwater is bruinerig. Ander sê hul wit wasgoed verkleur bruin. En verskeie mense sê hulle drink lankal nie meer Windhoek se kraanwater nie.
Die munisipaliteit het onlangs 'n verklaring uitgereik om te sê hulle is bewus van die klagtes, maar hulle hou steeds streng by hul gehaltebeheerprogram. Bekommerde inwoners kan wel met die munisipaliteit se wetenskaplike afdeling by (061) 290 3462/3469/3470 in verbinding tree, veral in gevalle waar die water voortdurend verkleur is.
“Ons kraanwater word daagliks getoets om seker te maak dit voldoen aan die standaarde soos voorgeskryf deur die wêreldgesondheidsorganisasie (WHO),” het die munisipaliteit se woordvoerder, me. Lydia Amutenya, gesê.
Volgens 'n kennisgewing wat intussen deur die munisipaliteit uitgereik is, kan daar verskeie redes vir die bruin water wees.
“Die voortdurende waterkrisis het die munisipaliteit geforseer om beduidende veranderinge aan die stad se watertoevoerstelsel te maak.
Tans pomp ons groot hoeveelhede ondergrondse water – meer as ooit vantevore – uit die Windhoek-akwifer.
“Soos die pompprogram uitbrei, moet ons steeds die toestand van die water by verskeie van die nuwe boorgate bepaal. Die hersamestelling van die waterverspreidingstelsel kan egter ook veroorsaak dat residu, wat lank reeds in pype lê, opnuut weer hul weg na reservoirs en verbruikers vind,” lui die kennisgewing.
Die munisipaliteit sê Windhoek se waternood is steeds kritiek, maar tog het waterbesparings in Januarie tot onder 25% geval. Dit is die swakste besparing in die afgelope agt maande, behalwe vir November verlede jaar toe waterbesparing ook lae vlakke bereik het.
“Rondom Kersfees en Nuwejaar is tot 45% water bespaar, maar ná die feesseisoen het dit vinnig weer tot 30% gedaal, voor dit nou weer tot 24% geval het,” het Amutenya gesê.
“Die rede vir die aanvanklike goeie besparings kan toegeskryf word aan die feit dat mense weg was met vakansie. Maar ons vra Windhoekers steeds om soveel water as moontlik te bespaar.
“Ten spyte van die bietjie reën wat reeds geval het, het dit nog nie verligting vir Windhoek se waternood gebring nie, omdat baie min water die Von Bach-, Omatako- en Swakoppoortdam binnegevloei het,” het sy gesê.
“Die watertoevoersituasie bly dus kritiek.”
Kommentaar
Republikein
Geen kommentaar is op hierdie artikel gelaat nie