Wagte geteiken tydens rooftogte

Vier verdagtes het Saterdag omstreeks 09:00 ’n veiligheidswag by die Black Chain inkoopsentrum in Katutura beroof. Na bewering het die mans N$83 251 van die PEP-winkel se geld van die wag gesteel. Hy het die geld van ’n winkelassistent ontvang en was op pad na die deur, toe die mans hom met ’n pistool in die winkel aangehou het. Die verdagtes het ook sy pistool afgeneem. Hulle het boonop van MTC N$7 031 en van Ackermans N$44 366 gesteel wat ook deur die veiligheidswag ingesamel is.Die rowers het dus met ’n gesamentlike N$134 648 in ’n wit VW Polo op die vlug geslaan. Niemand is nog in hegtenis geneem nie.• Vier mans het Saterdag omstreeks 08:30 twee veiligheidswagte by die Metro groothandelaar in die Noordelike Nywerheidsgebied in Windhoek beroof. Die wagte was besig om kontant op te tel om na die bank te neem, toe hulle met wapens aangehou is. Die verdagtes het met N$756 612 en een van die wagte se vuurwapen op die vlug geslaan. Niemand is in hegtenis geneem nie. • Saterdag omstreeks middernag het verdagtes by die Shafa mini-mark in die Onanyalala-nedersetting (Omusati) die veiligheidswag in sy kamer oorrompel en vasgebind. Hulle het toe die sinkplate na die kamer van die werker stukkend gesny en toegang tot haar kamer gekry. Hulle het haar met ’n panga en ’n mes gedreig en kontant, alkohol, koekies en sewe selfone wat na die winkel gebring is om herlaai te word ter waarde van N$15 770 gesteel. Niemand is in hegtenis geneem nie. • Kubaanse burgers is Vrydag in hul huis in Bacon-straat in Academia deur verdagtes, gewapen met pangas, aangeval en beroof. Die slagoffers is met die pangas beseer en is na die hospitaal geneem vir behandeling. Die verdagtes het met skootrekenaars, juwele, selfone, klere en televisiestelle op vlug geslaan. Die waarde is nie bekend nie. Niemand is in hegtenis geneem nie. • Verdagtes het Vrydag omstreeks 02:00 by ’n erf in Tsumeb ingebreek en ’n bakkie gesteel. Die verdagtes het die metaalblou Toyota-bakkie ter waarde van N$65 000 uit die erf gestoot en daarmee op die vlug geslaan. Niemand is nog in hegtenis geneem nie. • Vrydag om 03:00 is ’n silwer Toyota Corolla uit erf 1220 in 13de straat op Tsumeb gesteel terwyl die eienaar geslaap het. Die voertuig is glo as ’n taxi gebruik. Niemand is nog in hegtenis geneem nie. • Drie verdagtes het Vrydag om 01:00 twee waterpompe ter waarde van N$66 000 van die plaas Farm Drie Rivier No. 302 naby Rehoboth gesteel. Na bewering het die verdagtes hul voertuig ’n ent van die plaas af geparkeer en soontoe geloop. Niemand is nog in hegtenis geneem nie en die polisieondersoek duur voort.

Wagte geteiken tydens rooftogte

Kommentaar

Republikein 2025-07-02

Meld asseblief aan om kommentaar te lewer

Wagte geteiken tydens rooftogte

Kommentaar

Republikein 2025-07-02

Meld asseblief aan om kommentaar te lewer

MELD AAN

Advertensie