Republikein Newspaper

Elvira Hattingh - Gemeenskappe wat teenaan die Kunenerivier woon, is gister teen moontlike oorstroming gewaarsku.

Dit omdat die rivier by Ruacana teen 1 136,7 m³/s gevloei het, terwyl die Caluequedam, wat stroomop geleë is, reeds vol was.

Die Hidrologiese Dienste van Namibië het gewaarsku damwater sal na verwagting uitgelaat moet word.

Terselfdertyd het water dié dam teen 1 806,04 m³/s binnegevloei.

Volgens die Hidrologiese Dienste se jongste vloedbulletin was die Zambezirivier óók besig om te styg en het dit teen gisteroggend reeds 1,59 m diep by Katima Mulilo gevloei – sowat 2 cm dieper as ’n dag tevore.

Die Kavangorivier het oornag ook water bygekry en by Rundu en Nkurenkuru onderskeidelik 6,24 m en 4,08 m diep gevloei. Dit verteenwoordig ’n styging van 8 cm en 11 cm op dié twee plekke.

Die Oranjerivier se vlakke by Blouputs is egter kommerwekkend laag en het gisteroggend op 0,35 m gestaan.

VOORSPELLING

Terselfdertyd het mnr. Johan van den Berg, ’n landbouweerkundige by Santam Suid-Afrika, Woensdag gesê gemiddelde tot bogemiddelde reën word van Februarie tot April in die droogtegeteisterde gebiede van Namibië verwag.

Dieselfde geld die ewe droë Noord- en Oos-Kaap.

Hy het in sy jongste weervooruitskouiing gesê daar is positiewe verwagtinge vir Namibië se sentrale en suidelike dele – nog vóór die winter kom.

“Die feit dat die Suidelike Ossillasie-indeks (SOI) in Januarie ’n vinnigstygende fase ervaar het, is beduidend – veral wanneer dit in hierdie deel van die reënseisoen gebeur,” het Van den Berg gesê.

Die SOI is ’n maatstaf van die verband tussen seeoppervlaktemperature in die Niño-gebiede en oorhoofse weerstelsels.

“’n Vinnigstygende SOI in Januarie word gewoonlik vereenselwig met ten minste gemiddelde reënneerslae oor Namibië, asook die sentrale en westelike dele van Suid-Afrika. Dit geld van Februarie tot April,” het Van den Berg gesê.

Hy meen kort- tot mediumtermynvoorspellings dui daarop dat reënneerslae van die tweede deel van Februarie af kan verbeter.

Verder sê hy ook die meeste Niño-gebiede is tans steeds neutraal (tussen 0,2°C en 0,5°C bo normaal) en dat dit na verwagting tydens die Suidelike Halfrond se somer so sal bly.

Van den Berg sê die SOI se stygende fase is ’n aanduiding dat wegbeweeg word van El Niño-tipe patrone na neutraler toestande.

Nog goeie nuus is die Indiese Oseaan-dipool (IOD) is vir die eerste keer sedert Mei verlede jaar nié in ’n positiewe fase nie, maar “goed binne sy neutrale reikwydte”, het Van den Berg gesê.

Voorspellings dui aan die IOD sal in sy neutrale fase oor die volgende maande voortduur.

SEISOEN ONDERGEMIDDELD

Volgens ’n seisoenale vooruitskouiing wat verlede jaar deur die Namibiese weerkantoor se klimaat- en databank uitgereik is, sou die grootste dele van Namibië van Januarie tot Maart normale tot ondernormale reën ontvang.

Tog het die grootste dele van die land tot dusver ’n ondergemiddelde of ietwat ondergemiddelde seisoen gehad, toon ’n verslag wat onlangs deur die ministerie van werke en vervoer se afdeling vir meteorologiese dienste uitgereik is.

– [email protected]