Visvangregte só toegeken

Augetto Graig – Die minister van visserye en mariene hulpbronne, dr. Albert Kawana, het gister uiteindelik die toekenning van grootmaat visvangregte aangekondig.

In die proses wat in Augustus 2018 afgeskop is om omwenteling in Namibië se visvangbedryf te bring, is nou 213 nuwe toetreders tot dié winsgewende bedryf uitgeken en is bevestig dat aan 85 van vorige visvangregte houers opnuut regte toegeken is.

Kawana dring aan dat van nou af streng monitering van Namibië se visvangnywerheid toegepas sal word, om te verseker die natuurlike hulpbron begunstig veel meer Namibiërs en veral die kwesbare dele van die ­samelewing wat deur liefdadigheidsorganisasies en ander verteenwoordigende ondernemings in vennootskap met visvangmaatskappye getree het.

“Die ministerie is bewus van sekere maatskappye wat ander mense se name en in sekere gevalle die name van liefdadigheidsorganisies gebruik het, maar wat in werklikheid nie voordele met hulle gedeel het nie,” het Kawana gesê.

Hy sê die ministerie sal verseker dat streng maatreëls ingestel word om die proses te monitor en toe te sien dat veral kinders, gestremde mense en gemarginaliseerde gemeenskappe uit die visvangbedryf baat.

Verder dring Kawana daarop aan dat meer Namibiërs indirek uit die visbedryf begunstig moet word, deur te verseker dat die goedere en dienste wat die nywerheid gebruik, binne Namibië se grense aangekoop word.

Hiervoor sal hy met die ministerie van handel, nywerheidsontwikkeling en kleinsakeontwikkeling werk om goedere en dienste uit te ken wat in Namibië beskikbaar is.

“Ek sal ook met die minister van landbou praat om te verseker die kos wat op daai skepe en in daai ­fabrieke geëet word, kom van Namibië.

“Ek sal verseker dat die tamaties vir die inmaakfabrieke nooit ingevoer word terwyl ons eie tamaties ­toegelaat word om vrot te raak nie. Ek sal verseker dié wat nie regte kry nie, word steeds indirek begunstig,” sê hy.

Uit meer as 5 000 aansoekers om visvangregte was die oorgroot meerderheid nie suksesvol nie. Kawana sê egter dit is nou die eerste keer dat begunstigdes uit elk van Namibië se 14 streke voordeel uit visvangregte sal trek.

Verder werk sy ministerie steeds om die aandeelhouers uit te ken binne elke ­onderneming aan wie regte toegeken is. Hierdie lys sal binne twee maande ook vrygestel word, sê hy.

“Vandag het ons dit reggekry om die visseryesektor te herskep deur te verseker die jeug het 'n aandeel in die sektor, so ook vroue, veterane, gemarginaliseerde gemeenskappe en ons gestremde burgers; ons ­kleinboere, ons gemeenskappe, ons tradisionele owerhede, ons streke, studente en godsdienstige organisasies het 'n aandeel in die sektor. Ek kan met vertroue sê dat al hierdie belanghebbers binne die nuwe toekennings geakkommodeer is,” sê die minister.

Kawana sê egter die kraaines van eienaarskap in visvangmaatskappye moet eers ontrafel word voor hervorming van die visvangbedryf tot meer gelyke voordeel aan almal bereik kan word.

Hierdeur sal duidelik gesien kan word presies wie die miljarde se waarde in visfabrieke en visvang­skepe besit en ook hoe die meer as 7 200 viswerkers beter voordeel uit die bedryf kan trek.

– [email protected]