Video oor robredding versprei soos veldbrand
Op die video kan gesien word hoe 'n verstrengelde rob aan 'n stertvin beetgekry word en versigtig van 'n rol vislyn bevry word.
Elvira Hattingh
'n Video wat wys hoe mnr. Naudé Dreyer, van Pelican Point Kayaking, en een van sy spanlede 'n rob van 'n rol vislyn bevry wat om sy nek was, het sedert Woensdag soos 'n veldbrand op sosiale media versprei.
Dreyer het aan Republikein vertel hy het dié rob 'n rukkie gelede reeds raakgesien en vir 'n week lank probeer om hom te vang – sonder sukses.
Hy en mnr. Schalk Louw het Woensdag toe uiteindelik daarin geslaag om hom te vang en om die vislyn vinnig los te kry voor die rob weer die see in is, het hy gesê.
Op die video kan gesien word hoe Dreyer en Louw tussen 'n kolonie robbe inhardloop, die verstrengelde rob aan 'n stertvin beetkry, en dan versigtig vasvatplek agter sy kop kry.
Hulle pen hom dan op die grond vas en skuif die rol vislyn vorentoe oor sy kop, terwyl sy kop steeds vasgehou word.
Die spartelende rob hap telkens in hul rigting.
Dreyer het gesê hy en sy span kom gereeld op robbe af wat in vislyn of selfs stukke klere verstrengel is.
Dreyer besit Pelican Point Kayaking, wat kajaktoere naby Pelikaanpunt aanbied, maar hy en sy span is aktief betrokke by die redding en beskerming van seediere.
Volgens hom is die tyd beperk om robbe te help, omdat paringstyd binnekort aanbreek en robbulle dit bemoeilik.
Binnekort sal verskeie wyfies ook dragtig wees.
Dreyer en sy span wil graag hul redding- en beskermingwerk onder seediere uitbrei, maar het meer ondersteuning nodig voor dit 'n werklikheid kan word.
Hy sê ander kajakspanne help ook diere in nood waar hulle kan.
“As ons by 'n robkolonie verbygaan, kyk ek altyd goed of daar dalk een is wat in iets verstrengel is.
“Soms word hulle tot op die been gesny deur dit waarin hulle verstrengel is. Ons probeer so veel as moontlik red, maar soms vrek hulle. Ons is ook al deur hulle gebyt,” het hy gesê.
“Ons kan hulle ook net sekere tye van die jaar help. As dit paartyd is, is die bulle baie aggressief en kan jy nie tussen hulle inhardloop nie. Dieselfde wanneer daar klein welpies is, want die kleintjies kan nie swem nie. As jy dan tussen hulle sou inhardloop, gaan die kleintjies saam see toe en sal hulle verdrink,” het hy gesê.
Dreyer sê hulle glo nie dit is vissersbote wat vislyn en ander gemors in die see ingooi nie, maar eerder vragskepe.
Volgens hom werk hy en sy span nou met die Namibian Dolphin Project saam, wat bekend is vir hul werk onder dolfyne en ook onder walvisse aan die kus.
Dié projek het hulle van die nodige toerusting voorsien om robbe te help.
Dreyer het ook al voorheen video's op Facebook gedeel waar gestrande of beseerde dolfyne gehelp word om na die see terug te keer.
'n Video wat wys hoe mnr. Naudé Dreyer, van Pelican Point Kayaking, en een van sy spanlede 'n rob van 'n rol vislyn bevry wat om sy nek was, het sedert Woensdag soos 'n veldbrand op sosiale media versprei.
Dreyer het aan Republikein vertel hy het dié rob 'n rukkie gelede reeds raakgesien en vir 'n week lank probeer om hom te vang – sonder sukses.
Hy en mnr. Schalk Louw het Woensdag toe uiteindelik daarin geslaag om hom te vang en om die vislyn vinnig los te kry voor die rob weer die see in is, het hy gesê.
Op die video kan gesien word hoe Dreyer en Louw tussen 'n kolonie robbe inhardloop, die verstrengelde rob aan 'n stertvin beetkry, en dan versigtig vasvatplek agter sy kop kry.
Hulle pen hom dan op die grond vas en skuif die rol vislyn vorentoe oor sy kop, terwyl sy kop steeds vasgehou word.
Die spartelende rob hap telkens in hul rigting.
Dreyer het gesê hy en sy span kom gereeld op robbe af wat in vislyn of selfs stukke klere verstrengel is.
Dreyer besit Pelican Point Kayaking, wat kajaktoere naby Pelikaanpunt aanbied, maar hy en sy span is aktief betrokke by die redding en beskerming van seediere.
Volgens hom is die tyd beperk om robbe te help, omdat paringstyd binnekort aanbreek en robbulle dit bemoeilik.
Binnekort sal verskeie wyfies ook dragtig wees.
Dreyer en sy span wil graag hul redding- en beskermingwerk onder seediere uitbrei, maar het meer ondersteuning nodig voor dit 'n werklikheid kan word.
Hy sê ander kajakspanne help ook diere in nood waar hulle kan.
“As ons by 'n robkolonie verbygaan, kyk ek altyd goed of daar dalk een is wat in iets verstrengel is.
“Soms word hulle tot op die been gesny deur dit waarin hulle verstrengel is. Ons probeer so veel as moontlik red, maar soms vrek hulle. Ons is ook al deur hulle gebyt,” het hy gesê.
“Ons kan hulle ook net sekere tye van die jaar help. As dit paartyd is, is die bulle baie aggressief en kan jy nie tussen hulle inhardloop nie. Dieselfde wanneer daar klein welpies is, want die kleintjies kan nie swem nie. As jy dan tussen hulle sou inhardloop, gaan die kleintjies saam see toe en sal hulle verdrink,” het hy gesê.
Dreyer sê hulle glo nie dit is vissersbote wat vislyn en ander gemors in die see ingooi nie, maar eerder vragskepe.
Volgens hom werk hy en sy span nou met die Namibian Dolphin Project saam, wat bekend is vir hul werk onder dolfyne en ook onder walvisse aan die kus.
Dié projek het hulle van die nodige toerusting voorsien om robbe te help.
Dreyer het ook al voorheen video's op Facebook gedeel waar gestrande of beseerde dolfyne gehelp word om na die see terug te keer.
Kommentaar
Republikein
Geen kommentaar is op hierdie artikel gelaat nie