Vermeende moordenaar weier glo verplasing

Seun loof polisieoptrede

24 April 2019 | Howe
Denver Kisting



Die 57-jarige man wat na bewering 'n anderhalf week gelede agt noodlottige skote op Arandis afgevuur het, was glo ongelukkig omdat hy van Tsumeb na Keetmanshoop verplaas is.

Hy is gister in verband met 'n dubbele moord in hegtenis geneem, maar nog nie voor die hof gedaag nie.

Sy baas, mnr. Eckhart Mueller (72), en dié se adjunk, mnr. Heimo Hellwig (60), het verlede Maandag in dié koeëlreën gesterf. Hulle is in die kop en maag getref en is op die toneel dood.

Die verdagte het glo tussen 06:00 en 07:00 verskeie kere die sneller getrek nadat Mueller en Hellwig oudergewoonte saam in Mueller se Mercedes-Benz op die Arandis-kampus van die Namibië Instituut van Mynbou en Tegnologie (Nimt) aangekom het.

Mnr. Richard Mueller, 'n seun van Mueller en bekende Windhoekse prokureur, het gister die nuus oor die inhegtenisneming verwelkom. “Wonderlik. Dit klink goed.”

Hy het die polisie vir hul flinke optrede geloof.

Sy pa en Hellwig het daagliks tussen Swakopmund en Arandis vir werk gependel.

'n Ander kollega wat ook dikwels saamgery het, het hulle nie daardie oggend vergesel nie.

Richard Mueller het gister gesê hy het die verdagte nog nooit ontmoet nie. Hy was egter bewus van die spanning, sê hy.

Mnr. Ralph Bussel, die hoof van die ingenieurswese-afdeling van die hoofkampus, het gister bevestig die verdagte was steeds op Tsumeb ge­stasioneer nadat die vermeende moordenaar glo geweier het om Keetmanshoop toe te trek.

Bussel sê dié man het daagliks tussen Otavi en Tsumeb gependel.

Die verdagte is 'n pas-en-draaidosent.

Bussel sê die studente en personeellede van die Arandis-kampus is gisteroggend weer eens huis toe gestuur.

Volgens hom wag hulle op die polisie om te hoor wanneer hulle hul werksaamhede mag hervat.

In hierdie stadium word die kampus nog as 'n misdaadtoneel hanteer, sê hy.

Die gemeenskap van dié dorpie het ook gister 'n kranslegging buite die gebou gehad waartydens kerse voor die foto's van die ontslape mans aangesteek is.

Bussel sê geen waarnemende tussentydse hoofde is al aangestel nie. Die bestuurslede verdeel in dié stadium die verantwoordelikhede, sê hy.

Volgens hom is die akademiese bedrywighede op die Tsumeb- en Keetmanshoop-kampus nie onderbreek nie.



GESAMENTLIKE ROUDIENS

Richard Mueller sê 'n gesamentlike roudiens word steeds aanstaande Dinsdag op Swakopmund gehou.

Private seremonies op uitnodiging vind later plaas.

Die waarnemende hoof van die polisie se skakelafdeling, hoofinsp. Kauna Shikwambi, het gister gevra die polisieondersoek moet eerbiedig word.

Sy kon nie bevestig of vroeëre klagte weens die beweerde onwettige besit van wapens en ammunisie teen mnr. Ernst Josef Lichtenstrasser (57) laat vaar is nie. Dié klagte is in 2013 op Karibib aanhangig gemaak.

Lichtenstrasser het Paasnaweek in aanhouding deurgebring en het vroeg gisteroggend voor assistentlanddros Monalisa Hays verskyn.

Shikwambi sê Lichtenstrasser het na bewering die wapen- en ammunisiewet oortree.

Daarvolgens mag 'n mens nie in besit van enige ammunisie wees nie, behalwe as hy of sy wettig 'n wapen besit waarmee daardie ammunisie geskiet mag word.

Vroeër is berig Lichtenstrasser is glo met twee patrone vir 'n .22-geweer betrap.

Dié saak is tot 27 Mei vir verdere polisieondersoek uitgestel.

Geen borgtog is toegestaan nie.



VERDAGTE VAS

Die verdagte in die Arandis-slagting is verlede week op Karibib vir ondervraging aangekeer.

Hy is na wat verneem word gister in verband met die moorde in hegtenis geneem kort nadat hy op 'n ander klag in die Karibib-landdroshof verskyn het. Omdat hy nie gister soos verwag voor die hof gedaag is nie, word sy identiteit – wat aan Republikein bekend is – weerhou.

Komm. Andreas Nelumbu, die polisiebevelvoerder van die Erongo­streek, het gistermiddag by navraag gesê die ondersoekspan is nog besig om getuienis bymekaar te maak.

Maar, sê hy, die verdagte sal waar­skynlik nie vrygelaat word nie. “Ons wil nie dinge haas nie. Ons wil seker maak hy het 'n klag waarop hy moet antwoord.”

Shikwambi het laat gistermiddag gesê die verdagte sal na verwagting vandag in die Swakopmund-landdroshof verskyn.

Intussen het me. Justine Jonas, hoofsekretaris van die Metaal- en Verwante Werkersunie (Manwu), gister gesê die vakbond is geskok oor bewerings dat die verdagte 'n lid van hul vakbond is.

“Ons ken hom nie,” het sy gesê.

Soortgelyk

 

Kawana gee besonderhede oor viskwotas

2 ure gelede | Visserye

Nuwe aansoekers sal 56,2% van viskwotas ontvang en bestaande regtehouers die balans van 43,8%.Dr. Albert Kawana, wat as nuwe minister van visserye en mariene hulpbronne...

Namibië het nou 23 bevestigde Covid-19-gevalle

14 ure gelede | Gesondheid

Namibië se jongste bevestigde geval van Covid-19 (nr. 23) is 'n 38-jarige Namibiese vrou wat op 23 Mei vanaf Dar es Salaam, Tanzanië na Namibië...

The cream of the crop

14 ure gelede | Mense

Ester KamatiMonica Gwala (Niilenge), the owner of Mo-nize Farmstead Fresh Produce, is the only entrepreneur amongst six siblings, specifically in the field of agriculture –...

Namibië oper, Walvis toe

14 ure gelede | Regering

Denver Kisting – Die staatshoof, pres. Hage Geingob, sê fase 3 wat Dinsdag in werking tree, gaan van Namibiërs vereis om groter verantwoordelikheid vir hul...

Baie meer as miljard vir Air Nam nodig

14 ure gelede | Regering

Ronelle Rademeyer – Die N$984,6 miljoen wat in die nuwe boekjaar uit die belastingbetaler se sak na die nasionale redery gaan vloei, sal net “die...

Weer vir 29 Mei 2020

14 ure gelede | Weer

BINNELAND: Koud in die oggend, andersins sonnig en matig tot warm, maar warm tot baie warm in die Noorde.KUS: Sonnig en matig tot warm. GETYE...

Ouwêreldse vermaak by 'nuwe' inryteater

14 ure gelede | Kuns en vermaak

Yandi du PlessisDalk is jy al keelvol vir Netflix of ShowMax, of bloot net uitgekuier om by die huis te sit. Dalk verlang jy na...

Vier 'renosterstropers' verskyn in camera

14 ure gelede | Misdaad

Francoise Steynberg – Vier van die agt verdagtes wat vandeesweek in verband met renosterstropery en -horingsmokkelary vasgetrek is, het gister in camera in die streekshof...

San gebruik spaargeld vir wateraanleg

14 ure gelede | Omgewing

Die San-gemeenskap in die N‡a Jaqna-bewaringsgebied se water­infrastruktuur is al vir jare 'n uitdaging. Water is 'n skaarste in Namibië en inwoners van dié bewarings­gebied...