'Verkragter' glo onstabiel
Die verdagte se pa het sy hart gister teenoor Republikein oopgemaak.
Denver Kisting
Die vermeende verkragter van 'n tweejarige meisietjie is glo verstandelik onstabiel.
Sy pa en naamgenoot het gister sy hart teenoor Republikein oopgemaak.
“Die probleem is die mannetjie, wat dit gedoen het, is mallerig.”
Volgens die pa het die seun toe hy sowat 10 jaar oud was voor skool naby hul huis gaan water haal om te bad.
Die vermoede bestaan volgens die pa dat die man daardie oggend “'n gees” gesien het.
Hy het skreeuend huis toe teruggekeer en is sedertdien geestelik onstabiel, sê die pa.
Voor dié dag was daar geen teken van enige geestesversteurings te bespeur nie, het die pa gister telefonies uit Outjo gesê.
Die verdagte is al lank op mediese behandeling vir sy beweerde geestesongesteldheid, sê sy pa, 'n plaaswerker in die omgewing van dié Kunene-dorpie.
Volgens die pa is sy seun dikwels gewelddadig. “Hy sal sommer 'n byl vat en wil baklei.”
Die verdagte se ma en die tweejarige meisietjie se ouma is susters.
Hy het gisteroggend vlugtig voor landdros Peingondjabi Shipoh in die landdroshof op Outjo verskyn.
Die pa het gistermiddag gesê die landdros het hóm gevra om die hof oor sy seun se beweerde toestand toe te spreek.
Dít het gekom nadat die hof nie kon sin maak uit die onsamehangende bydrae van die verdagte nie.
Die pa sê die verdagte het sowat 'n week gelede sy 21ste verjaardag gevier.
Die saak is gister tot 19 November vir onder meer verdere polisieondersoek uitgestel.
Hiernaas het die hof ook gelas die man moet vir geestelike evaluering na Windhoek verwys word.
Sy aansoek om regshulp sal intussen verwerk word en na die regshulp-direktoraat gestuur word.
Me. Sean Nangombe het gister namens die staat aangekla.
Die man bly intussen in aanhouding.
Volgens die pa was hy nie vroeër vandeesweek op Outjo toe die voorval plaasgevind het nie.
“Ek het net die oproep gekry van die probleem hier.”
Hy moes hom toe van die plaas, waar hy werk, na die dorp haas om sy gesin en sy skoonfamilie by te staan.
Die pa sê omdat sy seun met sy aankoms reeds in aanhouding was, kon hy nog nie 'n gesprek met hom voer oor wat gebeur het nie.
Die meisietjie is ook intussen vir verdere mediese behandeling Windhoek toe gebring.
Sy is tydens die verkragting ernstig beseer.
Skokgolwe is dié week deur die land gestuur toe die voorval aan die lig kom.
Die verdagte het glo die kind van haar ouerhuis af weggelok onder die voorwendsel dat hy vir haar en twee ander seuntjies (een ook twee en een vier jaar oud) lekkers wou koop.
Die seuntjies het later teruggekeer, terwyl die meisietjie die volgende oggend bebloed in die bosse buite Outjo gevind is.
Almal se identiteite word weerhou om die meisietjie te beskerm.
Die vermeende verkragter van 'n tweejarige meisietjie is glo verstandelik onstabiel.
Sy pa en naamgenoot het gister sy hart teenoor Republikein oopgemaak.
“Die probleem is die mannetjie, wat dit gedoen het, is mallerig.”
Volgens die pa het die seun toe hy sowat 10 jaar oud was voor skool naby hul huis gaan water haal om te bad.
Die vermoede bestaan volgens die pa dat die man daardie oggend “'n gees” gesien het.
Hy het skreeuend huis toe teruggekeer en is sedertdien geestelik onstabiel, sê die pa.
Voor dié dag was daar geen teken van enige geestesversteurings te bespeur nie, het die pa gister telefonies uit Outjo gesê.
Die verdagte is al lank op mediese behandeling vir sy beweerde geestesongesteldheid, sê sy pa, 'n plaaswerker in die omgewing van dié Kunene-dorpie.
Volgens die pa is sy seun dikwels gewelddadig. “Hy sal sommer 'n byl vat en wil baklei.”
Die verdagte se ma en die tweejarige meisietjie se ouma is susters.
Hy het gisteroggend vlugtig voor landdros Peingondjabi Shipoh in die landdroshof op Outjo verskyn.
Die pa het gistermiddag gesê die landdros het hóm gevra om die hof oor sy seun se beweerde toestand toe te spreek.
Dít het gekom nadat die hof nie kon sin maak uit die onsamehangende bydrae van die verdagte nie.
Die pa sê die verdagte het sowat 'n week gelede sy 21ste verjaardag gevier.
Die saak is gister tot 19 November vir onder meer verdere polisieondersoek uitgestel.
Hiernaas het die hof ook gelas die man moet vir geestelike evaluering na Windhoek verwys word.
Sy aansoek om regshulp sal intussen verwerk word en na die regshulp-direktoraat gestuur word.
Me. Sean Nangombe het gister namens die staat aangekla.
Die man bly intussen in aanhouding.
Volgens die pa was hy nie vroeër vandeesweek op Outjo toe die voorval plaasgevind het nie.
“Ek het net die oproep gekry van die probleem hier.”
Hy moes hom toe van die plaas, waar hy werk, na die dorp haas om sy gesin en sy skoonfamilie by te staan.
Die pa sê omdat sy seun met sy aankoms reeds in aanhouding was, kon hy nog nie 'n gesprek met hom voer oor wat gebeur het nie.
Die meisietjie is ook intussen vir verdere mediese behandeling Windhoek toe gebring.
Sy is tydens die verkragting ernstig beseer.
Skokgolwe is dié week deur die land gestuur toe die voorval aan die lig kom.
Die verdagte het glo die kind van haar ouerhuis af weggelok onder die voorwendsel dat hy vir haar en twee ander seuntjies (een ook twee en een vier jaar oud) lekkers wou koop.
Die seuntjies het later teruggekeer, terwyl die meisietjie die volgende oggend bebloed in die bosse buite Outjo gevind is.
Almal se identiteite word weerhou om die meisietjie te beskerm.
Kommentaar
Republikein
Geen kommentaar is op hierdie artikel gelaat nie